गोरखा ः सवारी चालकमाथि सार्वजनिक स्थलमा हातपात गर्नेलाई कानुन वमोजिम कारवाहीको माग गर्दै मजदुर संघ संगठनले ज्ञापनपत्र वुझाएका छन् ।

मंगलबार अखिल नेपाल यातायात मजदुर संघ र नेपाल यातायात स्वतन्त्र मजदुर संगठनले संयुत्त रुपमा जिल्ला प्रशासन र प्रहरी कार्यालयमा ज्ञापनपत्र वुझाउँदै चैत ११ गते गोरखा नगरपालिका–११ वाह्रकिलोमा सवारी चालक माथि हातपात गर्नेलाई कारवाहीको माग गरेको हो ।

चैत ११ गते बाह्रकिलोबाट ठाँटीपोखरी जाँदै गरेको ग १ ख ७१९१ नम्वरको यात्रुवाहक वस र विपरित दिशाबाट आउदै गरेको बा २० च ५८५८ नम्वरको निजि कार एक आपसमा ठक्कर खाँदा सवारीमा क्षति पुगेको थियो । सोहि विषयको विवादमा वस चालक अजिरकोट गाउपालिका–५ घर भएका अर्जुन परियार र सहचालक सिरानचोक–७ का टिकाराम नेपाली माथि कुटपिट भएको ज्ञापनपत्रमा उल्लेख छ ।

कुटपिटमा हरि श्रेष्ठ, धुव्र श्रेष्ठ, समिर श्रेष्ठ लगायत अन्य तिन जना समेतले सार्वजनिक स्थलमा चोडपिडा दिने गरी कुटपिट गरेको विज्ञेप्तीमा उल्लेख छ । घटनामा संलग्नलाई कानुन वमोजिम कारवाहीका लागि चैत १२ गते दरखास्त दर्ता गर्न जाँदा पनि प्रहरीले इन्कार गरेको ज्ञापनपत्रमा भनिएको छ ।

‘माथिबाट प्रेसर आएकाले तपाईहरुको जाहेरी दरखास्त दर्ता गर्न सकिएन भनि गैह्रजिम्मेवार जवाफ आएकोले हामी यातायात मजदुर अन्यायमा परेको र असुरक्षित महसुस गरेका छौँ,’ ज्ञापनपत्रमा भनिएको छ । दोषि माथि कानुन वमोजिम कारवाही गरी सुरक्षाको प्रत्याभुत नभए सार्वजनिक यातायात वन्द गर्ने चेतावनी समेत मजदुर संघ÷संगठनले दिएका छन् ।