संयुक्त राज्य अमेरिकाको अन्तर्राष्ट्रिय विकास नियोग (युएसएआईडी)÷मानवीय सहायता ब्यूरो (बीएचए) र संयुक्त राष्ट्रसङ्घको खाद्य तथा कृषि सङ्गठन (एफएओ) नेपालको संयुक्त मिसन टोलीले हालै गोरखा जिल्लाको बारपाक सुलिकोट गाउँपालिकाको भ्रमण गरेको छ ।

“भूकम्प प्रभावित क्षेत्रमा समुदायमा आधारित पहिरो जोखिम न्यूनीकरण मार्फत जोखिममा रहेका जनताको जीविकोपार्जन सुदृढीकरण” परियोजना अन्तर्गत टोलीले २०८० चैत १२ देखि १४ गतेसम्म बारपाक सुलिकोट गाउँपालिकाको भ्रमण गरेको थियो । टोलीमा युएसएआइडीका मानवीय सहायता अधिकृत तथा सम्झौता अधिकृतका प्रतिनिधि म्याथ्यू प्रिबिस र दुवै संस्थाका विशेषज्ञ तथा सहयोगीहरु रहेका थिए ।

टोलीको प्राथमिक उद्देश्यमा परियोजनाका गतिविधिहरू प्रत्यक्ष अवलोकन गर्नु, सरोकारवालाहरूसँग अन्तरक्रिया गर्नु र समुदायमा पहिरो संरक्षण प्रयासको प्रभावबारे छलफल गर्नु रहेको थियो । भ्रमण टोलीले पहिलो दिन बारपाक सुलिकोट गाउँपालिकाका अध्यक्ष तथा विपद् सम्पर्क अधिकारी, भू तथा जलाधार व्यवस्थापन अधिकृत लगायतका सरोकारवालासँग छलफल गरी परियोजनाको प्रगति समीक्षा गरेको थियो ।

कार्यक्रममा एफएओ नेपालका विपद् जोखिम तथा न्यूनीकरण विज्ञ लीलाजङ्ग गुरुङले परियोजनाका उपलब्धि प्रस्तुत गरेका थिए । गुरुङका अनुसार यस परियोजनाकाले पहिरोको जोखिम मूल्याङ्कन गर्न, पूर्व सूचना प्रणाली स्थापना गर्न, प्राथमिकता प्राप्त पहिरोलाई स्थिर गर्न, जीविकोपार्जनमा विविधता ल्याउन र समुदायको उत्थानशीलता बढाउन मद्दत गरेको छ । पहिरो जोखिम पूर्वतयारी तथा न्यूनीकरणका उपाय, जीविकोपार्जन सुधार, स्थानीय सरकार र समुदायको क्षमता अभिवृद्धि र करिब १६ हेक्टर खेतीयोग्य जमिनको जीर्णोद्धारबाट करिब ३४१ घरधुरी लाभान्वित भएका छन् ।

बारपाक सुलिकोट गाउँपालिकाका अध्यक्ष विष्णु भट्टले २०७२ सालको भूकम्प र त्यसपछिका घटनाले निम्त्याएको पहिरोको जोखिम न्यूनीकरणका लागि परियोजनाले महत्वपूर्ण भूमिका निर्वाह गरेको बताए साथै उनले कम लागतको इन्जिनियरिङ र बायोइन्जिनियरिङ उपायहरू, साथै पहिरो पूर्व चेतावनी प्रणाली जस्ता उन्नत प्रविधिहरूको उपयोग सहित पहिरोको जोखिम न्यूनीकरणका प्रयासहरूको प्रशंसा गरे ।

गाउँपालिकाका विपद् सम्पर्क अधिकारी भीमकुमार श्रेष्ठले विपद् जोखिम न्यूनीकरणलाई संस्थागत गर्न र योजनागत रुपमा कार्यन्वयन गर्न परियोजनाले खेलेको भूमिकाबारे प्रकाश पारे । भू तथा जलाधार व्यवस्थापन अधिकृत चन्द्र सेढाईंले पहिरोको जोखिम न्यूनीकरणमा साझेदारीको सफलतामा खुशी व्यक्त गरे । कार्यक्रममा एफएओ नेपालका कार्यक्रम सञ्चालन विज्ञ अर्जुन थापाले परियोजनाको स्थानीयकरणमा गाउँपालिकाले खेलेको महत्वपूर्ण भूमिकाको लागि गाउँपालिका अध्यक्षप्रति आभार व्यक्त गरे साथै सहयोग र निरन्तर मार्गदर्शनका लागि युएसएआइडीको पनि प्रशंसा गरे ।

बैठकपछि टोलीले तीनखण्डे, खारुङ र स्याप्राङ पहिरो स्थलको भ्रमण गरी समुदायसँग अन्तक्र्रिया गरी परियोजनाको प्रभावबारे प्रतिक्रिया लिएको थियो । अधिकांश समुदायले परियोजनाको पहलका कारण पहिरोको जोखिमबाट बढी सुरक्षित महसुस गरेका थिए । यूएसएआईडीका प्रतिनिधिहरूले परियोजनाको कार्यान्वयनको प्रशंसा गरे । कार्यक्रमको दिगोपनमा जोड दिदै यस परियोजनाको सफलताहरू राष्ट्रिय र अन्तर्राष्ट्रिय रूपमा प्रचार प्रसार गर्न सुझाका थिए ।