गोरखा ः क्वार्ज क्रिष्टल गोरखा दरबारमा प्रतिस्थापन गरिने भएको छ । आज(शुक्रबार) प्रधानमन्त्री पुष्पकमल दाहाल उत्त कार्यक्रममा सहभागी वन्न गोरखा आउदै छन् ।

गत असार १४ गते गोरखा नगरपालिका वडा नम्बर ७ सतिपिपलस्थित चन्द्रमान शाहीको घरबाट प्रहरीले क्वार्ज क्रिष्टल बरामद गरेको थियो । उचित ब्यवस्थापन नहुँदा हाल सम्म उत्त क्वार्ज क्रिष्टल जिल्ला प्रहरी कार्यालयमा छ । सर्वदलिय वैठकबाट निर्णय गरेर गोरखा दरवार स्थित पृथ्वीनारायण शाहको गद्धी भएको स्थानमा उत्त क्वार्ज त्रिष्टल राख्न लागिएको हो ।

पूरातात्विक महत्वको क्वार्ज क्रिष्टल गोरखा दरबारमा प्रतिस्थापन गर्ने निर्णय यस अघि नै भइसकेको छ । उत्त क्वार्ज क्रिष्टल आज जिल्ला प्रहरी कार्यालयबाट रथमा राखि गोरखा दरवार परिसर पु¥याइने छ । सोहि कार्यक्रममा सहभागी हुन प्रधानमन्त्री प्रचण्ड विहान ११ बजे हेलिकप्टर मार्फत गोरखा दरबार आइपुग्ने कार्यक्रम तय भएको हो ।

प्रधानमन्त्री प्रचण्ड गोरखा दरवारमा क्वार्ज क्रिष्टल प्रतिस्थापन कार्यक्रममा सहभागी भए पश्चात पार्टी कार्यालयमा कार्यकर्ता भेटघाट तथा विकास आयोजनाहरुको अनुगमनको कार्यक्रम पनि तय भएको छ । दाहाल शुक्रबार नै काठमाडौ फर्कने छन् । गत साउनमा खानी तथा भूगर्भ विभाग काठमाडौंबाट आएका भूगर्भविदहरूले दुई दिन लगाएर परीक्षणमा गर्दा पारदर्शी ढुंगा क्वार्ज क्रिष्टल भएको पुष्टि भएको थियो ।

क्वार्ज क्रिष्टल शाही परिवारले पुस्तौंदेखि देउताका रूपमा पुज्दै आएका थिए । बाजे÷बराजुले कहाँबाट ल्याएका हुन् भन्ने शाही परिवारलाई यकिन थिएन । यो पारदर्शी ढुंगालाई कुलदेउताका रूपमा र विभिन्न तिथिहरूमा उनीहरूले पुज्ने गरेका थिए ।

विक्रिका लागि मोलमोलाई भइरहेको सुचनाका आधारमा प्रहरीले बरामद गरिसकेपछि शाही परिवारले पटक÷पटक प्रहरी कार्यालयमै पुगेर पत्थरलाई पूजा गर्दै आएका थिए ।