गोरखाः प्रसिद्ध धार्मिक स्थल मनकामना र गोरखकाली मन्दिरमा मंगलबार भक्तजनको भिड लागेको छ ।

चैते दशैको अवसरमा मन्दिर दर्शन गर्न आउने भक्तजनको भिड लागेको हो । गोरखा दरवारमा मात्र चार हजार पाँच सय बढी भक्तजन पुगेका छन् । गोरखा कालिका मन्दिरमा चैते दशैको अवसरमा विशेष पुजा हुने गर्छ ।

गोरखकाली मन्दिरमा पुजाका लागि आउने भक्तजनको भिड लागेपछि दुइ वटा लाइन मार्फत पुजाको ब्यवस्था मिलाइएको मन्दिरका पुजारी शारदा प्रसाद भट्टराइले बताए । काठमाडौं, चितवन, धादिङ, पोखरा लगायतका ठाउँबाट भक्तजनहरु गोरखा कालिका दर्शनका लागि आएका थिए ।

पछिल्लो समय गोरखा दरवारमा दैनिक एक हजार वढी भक्तजन आउन गरेका छन् । त्यस्तै चैते दशैको अवसरमा मनकामना दर्शनका लागि आउने भक्तजनको पनि घुँइचो लागेको थियो । मंगलबार करिव ६ हजार पाँच सय बढी भक्तजनले मनकामना मन्दिरको दर्शन गरेको मनकामना क्षेत्र विकास समितिका लेवेन्द्र गुरुङले जानकारी दिए ।