चालु आर्थिक वर्षको नौ महिनामा मात्र आठ हजार चार सय ५४ जनाले मनास्लु क्षेत्रको भ्रमण गरेका छन् ।

गोरखाः दुइ महिनाको अवधिमा मनास्लु क्षेत्रमा दुइ हजार तिन सय ५७ पर्यटक पुगेका छन् । पछिल्लो समय मनास्लु क्षेत्र आउने पर्यटकको संख्या वृद्धि भएको छ ।
मनास्लु संरक्षण क्षेत्र (एमक्याप)का अनुसार चैत महिनामा मात्र १ हजार आठ सय ११ जना विदेशी पर्यटकले मनास्लु क्षेत्रको भ्रमण गरेका छन् । सार्क राष्ट्रका ८ पुरुष र ९ महिला तथा अन्य राष्ट्रका ९ सय ८१ पुरुष र ८ सय २९ महिलाले मनास्लु क्षेत्रको भ्रमण गरेका हुन् । चालु आर्थिक वर्षको नौ महिनाको अवधिमा चैत महिनामा सवैभन्दा धेरै विदेशीले मनास्लु क्षेत्रको भ्रमण गरेको एमक्यापले जनाएको छ । त्यस्तै फागुन महिनामा ५ सय २९ जना विदेशी मनास्लु क्षेत्र पुगे । सार्क राष्ट्रका ९ पुरुष, ३ महिला तथा अनय राष्ट्रका दुइ सय ८५ जना पुरुष र दुइ सय ३१ जना महिला मनास्लु क्षेत्रमा पुगेको तथ्याङ्कमा उल्लेख छ । चालु आर्थिक वर्षको नौ महिनाको अवधिमा मात्र ८ हजार चार सय ५४ जनाले मनास्लु क्षेत्रको भ्रमण गरेको एमक्यापका प्रमुख सन्तोष सेरचनाले बताए । गत वर्ष भन्दा यस वर्ष मनास्लु पुग्ने पर्यटकको संख्यामा वृद्धि भएको उनले बताए । ‘गत आर्थिक वर्ष ७ हजार सात सय ५ जना पर्यटक मनास्लु क्षेत्र आएका थिए,’ उनले भने,‘चालु आर्थिक वर्षको ९ महिनामा मनास्लु भ्रमण गर्नेको संख्या आठ हजार कटिसकेको छ ।’ प्राकृतिक मनोरम सँगै सडक सञ्जाल विस्तार नभएकाले पनि मनास्लु क्षेत्र पर्यटकको रोजाइमा पर्ने गरेको शेरचनले बताए । सामाजिक, सास्कृतिक रहन सहन वुझ्न तथा लार्के पास गर्न रुचाउनेहरुले यस क्षेत्र भ्रमणका लागि आउने गरेका उनले बताए । मनास्लु क्षेत्र पुगेका पर्यटक हिमाली जनजीवन, गाउँवस्ती, प्राकृतिक सौन्दर्यताको अवलोकन गर्न पाउने छन् । साथै ८ हजार १ सय ६३ मिटर अग्लो मनास्लु हिमाल आरोहणका लागि पनि आरोही आउने गरेका छन् ।