गोरखा ः गोरखा दरवारमा जेठ १० गतेबाट २१औँ सवा लाख रोट महोत्सव हुने भएको छ । सिद्धाश्रम शक्ति केन्द्रको आयोजनामा ११ दिने महोत्सवको आयोजना गरिएको हो । महोत्सव वारे सोमबार पत्रकार सम्मेलन गरी जानकारी गराइएको थियो ।

११ दिन सम्म चल्ने महोत्सवमा सवालाख रोट गोरखनाथलाई अर्पण गरिने छ । महोत्सव अवधि भर प्रत्येक दिन विशेष पुजा, हवन, स्तुतिवन्दना, लगायतका कार्यक्रम हुने छन् ।

महोत्सवले धार्मिक पर्यटक भित्राउन सघाउ पुग्ने विश्वास लिइएको छ । काठमाडौ, भक्तपुर, ललितपुर, चितवन कास्की, पर्सा, सर्लाही, सिन्धुली लगायतका जिल्लाबाट भक्तजन महोत्सवमा सहभागी हुने जनाइएको छ ।

केन्द्रले २०६१ साल देखि सवालाख रोट महोत्सव गर्दै आएको छ । महोत्सवका संचालनका लागि २० लाख खर्च लाग्ने अनुमान गरिएको छ । गौ, जौ वा चामलको पिठोबाट तयार गरिएको ताइ र भुग्रे गरि दुइ थरी रोट गोरखनाथमा चढाउने गरिन्छ ।

हरेक मौसममा नयाँ अन्नवाली भित्रयाएपछि नयाँ अन्नको पिठोलाई घिउमा पकाएर रोट बनाई गोरखनाथलाई अर्पण गरेर मात्रखाने धार्मिक विश्वास यहाँका केहि स्थानीयहरुको छ । महोत्सवको पहिलो दिन झाँकी सहितको शोभा यात्रा निस्कने कार्यक्रम तय भएको छ ।

झण्डोत्तोलन, ज्योत पूजन, नाथयोगीहरुको वरण, स्तुति(वन्दना, स्तवन पाठ, गुरु गोरखानाथको विशेष पूजन लगायतका कार्यक्रमहरु हुने छ ।