गोरखा ः पालुङटार नगरपालिका–३ मा दुना टपरी बनाउने उद्योग सन्चालन हुने भएको छ । वडा नम्वर ३ महिला संजालले टपरी बनाउने उद्योग सन्चालन गर्न लागिएको हो ।

वडाको ३ लाख बजेटबाट सालको पातको दुना टपरी बनाउने मेसिन खरिद गरिएको वडा अध्यक्ष रविन्द्र अधिकारीले जानकारी दिए । वडाको विभिन्न टोलबाट सहभागी वनेका २० जनालाई ५ दिन तालिम दिएको उनले बताए ।

पालिका र वडाको समन्वयमा वजारिकरणमा सहयोग गर्ने प्रतिवद्धताका साथ उद्योग संचालन भएको पनि उनले बताए । पालिकाले १,२ र ३ वडाका लागि टपरि बनाउने ३ वटा मेसिन खरिद गरेको छ । वडा कार्यालय नजिकै रहेको पुरानो विद्यालय भवनमा उद्योग संचालन हुने उनले बताए ।

‘उद्योग संचालन भएपछि सिन्का बनाउने, जंगलबाट पात ल्याउने जस्ता काममा अन्य सदस्य पनि जोडिनुहुन्छ,’ उनले भने । उद्योगका लागि आवश्यक सिन्का र जंगलबाट खोजेर ल्याएको पातको तथा दुना टपरीको मुल्य भने वडाको वैठकबाट निर्धारण गर्ने तयारी गरिएको छ । महिलाहरुलाई उद्यमी बनाउने उद्धेश्यले उत्त कार्यक्रम गरिएको अधिकारीले बताए ।