गोरखा ः पशुमा पुर्ण खोप कार्यक्रम अन्तरगत ३ लाख ११ हजार ६ सय ९१ पशुवस्तुमा खोप लगाइएको छ ।

चालु आर्थिक वर्षको एक वर्षको अवधिमा ११ वटै पालिकामा पशुमा पुर्ण खोप कार्यक्रम संचालन गरिएको थियो । पशुमा पुर्ण खोप कार्यक्रमका लागि विनियोजन भएको १ करोड ४४ लाख मध्ये एक करोड ११ लाख खर्च भएको भेटेरिनरी अस्पताल तथा पशु सेवा विज्ञ केन्द्रले जनाएको छ ।

४१ हजार ६ सय ८८ गाई, ४७ हजार ४६ भैसी, १ हजार चार सय ५४ वंगुरलाई पशुमा पुर्ण खोप कार्यक्रम अन्तरगत खोरेत विरुद्ध खोप लगाइएको छ । त्यस्तै ४ हजार ५ सय ५२ गाई र ५ सय ६७ भैसीमा एल एस डि, एक लाख ९३ हजार चार सय २१ बाख्रा र आठ हजार ९ सय २२ भेँडामा पिपिआर, ८ हजार दुइ सय ६८ कुकुरमा रेविज, ५ हजार ७ सय ७३ वगुरमा स्वाइन फिवर विरुद्धको खोप दिइएको छ ।

केन्द्रमा रहेको १३ दरवन्दि मध्ये चार रिक्त रहेको पनि आइतबार भएको सार्वजनिक सुनुवाई कार्यक्रममा जानकारी गराइएको थियो । केन्द्रले उत्पादनमा आधारीत प्रोत्साहन, कृत्रिम गर्भाधानबाट जन्मेका उन्नत नश्लका पाडी बाच्छि हुर्काउन प्रोत्साहन कार्यक्रम, सामुदायीक तथा घरपालुवा कुकुर वन्ध्याकरण कार्यक्रम, माछाका भुरा खरिद ढुवानी लगायतका कार्यक्रम चालु आर्थिक वर्ष गरेको छ ।

९० वटा पाडी वाच्छी हुर्काउन १० हजारको दरले कार्यालयले अनुदान उपलब्ध गराएको थियो । उत्त कार्यक्रमका लागि ८५ लाख वजेट विनियोजन भएपनि सवै रकम खर्च भने हुन सकेन । कार्यालयले ६ सय रोपनी बाँझो जग्गामा घाँस खेती गर्ने योजना रहेपनि ७१ रोपनी जग्गामा मात्र घाँस खेतीका लागि कार्यालयले अनुदान उपलब्ध गराएको छ ।

चालु आर्थिक वर्ष पशुपन्छि दर्ता शुल्क बापत दुइ लाख ६५ हजार राजस्व पनि संकलन गरेको छ । केन्द्रको चालु आर्थिक वर्ष ५४ प्रतिशत वित्तिय प्रगति रहेको छ ।