गोरखा ः पालुङटार नगरपालिकाले ‘बनको वाँदर वनैमा’ भन्ने नाराका साथ शनिबार ६ हजार फलफुलका विरुवा रोपेको छ ।

नगरपालिकाको १५ औँ नगरसभा बाट ‘बनको बाँदर बनैमा’ भन्ने नीति पास भएको थियो । नगरपालिकाले नीति तथा कार्यक्रम कार्यन्वयनका लागि शनिबारबाट वृक्षारोपण अभियान शुरु भएको हो । नगरपालिकाको १० वटै वडामा सामुहिक रुपमा वृक्षारोपण गरिएको नगरपालिकाका प्रमुख प्रशासकीय अधिकृत गौतम भण्डारीले जानकारी दिए । घर वरिपरी नै उपलब्ध हुने विरुवा स्थानीयले स्वतस्फुर्त रुपमा रोपेको उनले बताए । केरा, आँप, कटहर, पिपल, स्वामी, किम्वु, मेवा, अम्वा, लिचि, भुइ कटहर, लप्सी लगायतका विरुवा सामुदायीक वनका खाली स्थान तथा खोला खाल्सीका किनारमा रोपिएको नगरपालिकाले जनाएको छ । ‘असार ३ गते नीति तथा कार्यक्रम ल्याएपछि असार दोस्रो साता सरोकारवाला सँग छलफल गरेका थियौँ,’उनले भने,‘सवैको सरसल्लाहमा आज(शनिबार) बाट विरुवा रोप्ने अभियान शुरु भएको छ ।’ वन कार्यालय, सामुदायीक वन उपभोक्ता समिति, टोल संस्था सँगको समन्वयमा वृक्षारोपण अभियान शुरु गरिएको उनले बताए । वनमै फलफुलका विरुवा रोपेपछि वाँदर नियन्त्रणमा केहि सहयोग पुग्ने अपेक्षा लिइएको छ । ‘यहि नै मात्र उपाय त होइन, तर पनि प्राकृतिक उपायको रुपमा वनमा फलफुल रोपे केहि नियन्त्रण हुन्छ कि भन्ने छ,’ उनले भने । अभियानमा स्थानीय स्वत स्फुर्त रुपमा सहभागी बनेका थिए । चालु आर्थिक वर्षको नीति तथा कार्यक्रममा नगरपालिकाले ‘बनको बाँदर बनैमा’ नारा घोषणा गर्दै बाँदर, दुम्सी, मृगलगायतका वनयजस्तुबाट बालीनालीलाई संरक्षण गर्न आवश्यक प्राकृतिक उपाय अवलम्वन गर्ने नीति लिएको छ । बाँदर वढी भएको क्षेत्रमा बाँदरले नष्ट नगर्ने खुर्सानी, अदुवा, वेसार, जौ, टिमुर, कटहर, कागती जस्ता बालीको खेतीका लागि प्रोत्साहन गर्ने र जंगलमा फलफुलका विरुवा रोप्ने कार्यालाई अभियानको रुपमा संचालन गरिने पनि उल्लेख छ । नीति तथा कार्यक्रम कार्यन्वयनका लागि अभियानको रुपमा वृक्षारोपण शुरु गरिएको हो । अभियानले बन्यजन्तुबाट किसानलाई हुने गरेको क्षती कम गर्ने तथा प्राकृतिक रुपमा समेत सुन्दर बनाउने नगरपालिकाको अपेक्षा छ । वृक्षारोपण गर्न बाँकी रहेको क्षेत्रमा वडा, वन उपभोक्ता समिति तथा टोल सुधार संस्थाको समन्वयमा छिट्टै कार्यक्रम संचालन गरिने पनि नगरपालिकाले जनाएको छ ।