गोरखाः भिमसेन थापाको २५० औँ जन्मजयन्ती मनाइएको छ । भिमसेन थापा गाउँपालिका–८ बोर्लाङ स्थित चण्डिथोकमा रहेको भिमसेन थापाको शालिकमा माल्यार्पण लगायतका कार्यक्रम गरि जन्मजयन्ती मनाइएको हो ।

चण्डिथोकमा भिमसेन थापाको पालामा वनेको हवेलीको भग्नावशेष अझै देख्न सकिन्छ । यस क्षेत्रलाई पर्यटकीय स्थलको रुपमा विकास गराउन पनि स्थानीयले प्रयास थालेका छन् । चण्डीथोकमा भिमसेन थापा संग्रहालय, शालिक लगायतको पुर्वाधार निर्माण पनि भएको छ । हवेली रहेको चण्डीथोकमा ९ रोपनी क्षेत्रफल जग्गा ब्यवस्थापन गरिएको भिमसेन थापा बोर्लाङ प्रतिष्ठानका अध्यक्ष राजु थापाले बताए । ‘भिमसेन थापाको हवेली रहेको स्थलको जग्गा पनि ब्याक्तिको नाममा दर्ता भइसकेको रहेछ, केहि दान र केहि जग्गालाई पैसा तिरेर फिर्ता ल्याएका छौँ,’ उनले भने । उत्त स्थलमा संरचना निर्माणका लागि डिपिआर बनाइएको छ । गुरुयोजना अनुसार संरचना निर्माणका लािग ६ करोड खर्च लाग्छ । संघ र प्रदेश सरकार सँगको समन्वयमा भिमसेन थापा स्मृतिपार्क, सग्रहालय लगायतका संरचना तयार गर्ने योजनमा रहेको भिमसेन थापा गाउँपालिकाका अध्यक्ष लोक प्रसाद वंजाराले बताए । ‘जग्गा एकिकरण गरेर वृहत्तर गुरुयोजना बनीसकेको छ, कार्यन्वयनका लागि ६ करोड वजेट आवश्यक पर्छ, पालिकाको वजेटले मात्र पुग्दैन, संघ सरकार सँग मिलेर काम गर्नका लागि प्रस्ताव गरेका छौ्रँ,’ उनले भने । भिमसेन थापाको २५० औँ जन्मजयन्तीको अवसरमा वुधकार गाउँपालिकाले सार्वजनिक विदा पनि दिएको थियो । बुधबार गाउँपालिका भित्रका सरकारी कार्यालय, संघ संस्थाहरुमा सार्वजनिक विदा दिइएको थियो । प्रतिष्ठानका अध्यक्ष थापाको अध्यक्षमा चण्डीथोकमा भएको कार्यक्रममा गाउँपालिका अध्यक्ष बंजारा, प्रमुख जिल्ला अधिकारी भोला दाहाल, निमिक्त प्रमुख प्रशासकीय अधिकृत यानवहादुर नेपाली, वडा नम्वर ७ का अध्यक्ष नारायण श्रेष्ठ लगायतले मन्तब्य राखेका थिए । कार्यक्रमका वक्ताहरुले यस क्षेत्रको ऐतिहासिकताको उजागर गर्दै संरक्षण र प्रवद्र्धन गर्नुपर्नेमा जोड दिए ।