गोरखा ः शरद ऋतुका मनास्लु हिमाल आरोहणका लागि २९० जनाले अनुमती लिएका छन् ।

२५ टोलीका २१० पुरुष र ८० महिला गरि दुइ सय ९० जनाले अनुमती लिएका हुन । बुधबारसम्म सात वटा हिमाल आरोहणका लागि ३२ टोलीका ३२९ जनाले आरोहण अनुमति लिएका छन् । यसमध्ये सर्वाधिक संख्या मनास्लु हिमालको छ । मनास्लु हिमाल आरोहण गर्नेहरुबाट तिन करोड ४९ लाख ७१ हजार एक सय २० रुपैयाँ रोयल्टी पनि संकलन भएको छ । ८ हजार १ सय ८३ मिटर उचाइको मनास्लु हिमाल पछिल्लो समय आरोहिको रोजाइमा पर्ने गरेको छ । विशेष गरि शरद ऋतुमा मनास्लु आरोहण हुने गर्छ । अघिल्ला वर्षमा झैं यो वर्ष पनि मनास्लु हिमाल आरोहणमा आरोहीको आकर्षण देखिएको छ । मनास्लु आरोहणका लागि आरोहि मनाङको भिमथान हुँदै लार्केपासगरेर पनि आधारशिविर पुग्ने गरेका छन् । केहि आरोहि भने हेलिकप्टर मार्फत आधारशिविर पुग्छन् । शरद् ऋतु मनास्लु हिमाल आरोहणका लागि उपयुक्त मौसम मानिन्छ । गत वर्ष तिन सय वढीले मनास्लु आरोहणको अनुमति लिएका थिए । सन् १९५६ मे ९ तारिखमा जापानी नागरिक तोसियो इमनिसी र नेपाली ग्याल्जेन नोर्बु शेर्पाले मनास्लुको सफल आरोहण गरेका थिए । त्यस्तै मनास्लु क्षेत्र घुम्न जाने पर्यटकको संख्या पनि वृद्धि हुदै गएको छ । गत आर्थिक बर्ष मात्र ९ हजार ७ सय ८३ जनाले मनास्लु क्षेत्रको भ्रमण गरे । साहसिक आरोहिको रोजगाइमा मनास्लु पर्ने गर्छ ।