गोरखाः मनास्लु संरक्षण क्षेत्र घुम्न जाने पर्यटक सँग चुमनुव्री गाउँपालिकाले आज(मंगलबार)बाट प्रवेश शुल्क लिने भएको छ । जगतमा काउन्टर राखेर प्रवेश शुल्क संकलन गर्ने गाउँपालिकाले जनाएको छ । गाउँपालिका क्षेत्रभित्र पदयात्रा तथा पर्वतारोहणका लागि आउने विदेशी पर्यटकबाट प्रतिब्याक्ति एक हजार र नेपाली पर्यटकबाट प्रतिब्याक्ति दुइ सय रुपैयाँ पदयात्रा शुल्क उठाउने गाउँपालिकाले जनाएको छ । सोमबार एक सुचना प्रकाशित गर्दै पर्यटकलाई पदयात्रा शुल्क तिरेर मात्र प्रवेश गर्न आग्रह गरिएको छ ।

गत असार ८ गतेको कार्यपालिका वैठक पछि अघिल्लो शुक्रबार सर्वपक्षिय वैठक राखेर शुल्क उठाउने निर्णय भएको थियो । एमक्याप क्षेत्रमा जाने पर्यटकसँग सम्बन्धीत संरक्षण तथा निकुञ्ज ऐनबमोजिम राष्ट्रिय प्रकृति संरक्षण कोष तथा अध्यागमन विभागले पनि शुल्क उठाउँदै आएको छ । आफ्नो अधिकार क्षेत्रभित्र पनि शुल्क उठाउन नपाउँदा अपेक्षित कर संकलन गर्न नसकिएको र कोषले पनि उठेको शुल्क बाँडफाँट नगरेको पालिकाले जनाएको छ । पालिकाले उठाएको पदयात्रा शुल्कबाट समग्र चुमनुब्री तथा मनास्लु संरक्षण क्षेत्रको वातावरण संरक्षण एवं पर्यटन क्षेत्र प्रवर्द्धनमा लगानी गर्ने समेत पालिकाले जनाएको छ । मनास्लु संरक्षण क्षेत्र अन्तरगत चुमनुव्री गाउँपालिकाको ७ वटा वडा पर्छन् । आन्तरिक आय न्यून रहेको तथा पर्यटन नै मुख्य ब्यवसाय रहेकाले शुल्क उठाउने निर्णय भएको गाउँपालिकाले जनाएको छ । पछिल्लो समय मनास्लु क्षेत्र घुम्न जाने विदेशी पर्यटकको संख्या वढ्दै गएको छ ।