नेपाल कम्युनिष्ट पार्टी (नेकपा) गण्डकी प्रदेशका पदाधिकारी तथा सदस्यहरुले सामुहिक रुपमा सपथ ग्रहण गरेका छन् ।

नेकपा एमाले र नेकपा माओवादी केन्द्र एकीकरण पछि बनेको नेकपाको गण्डकी प्रदेश सदस्यमा चयन भएका प्रदेश पदाधिकारीसहित १८९ सदस्यहरुले विहीबार सामूहिक रुपमा सपथ लिएका हुन् ।

कार्यक्रममा गण्डकी प्रदेशका मुख्यमन्त्री तथा नेकपा गण्डकी प्रदेशका ईञ्चार्ज पृथ्वी सुब्बा गुरुङले पार्टीकै नेतृत्वमा सरकारले समृद्धी र समाजवाद ल्याउने बताए । पार्टी मजबुत नभएसम्म सरकार बलियो नहुने बताउँदै उनले भने,‘सरकार चलाउने पार्टीले नै हो, अनि समाज र समृद्धिको सपना पूरा गर्ने नेतृत्व पनि पार्टीले नै गर्नुपर्छ, यसका लागि पार्टी मजबुत हुनुपर्छ ।’

नेकपा गण्डकी प्रदेशका अध्यक्ष हितराज पाण्डेले सामुहिक भावनामा पार्टीलाई अघि बढाउने प्रतिबद्धता जनाए ।

नेकपा गण्डकी प्रदेशले जनयुद्ध दिवस मनाउने

नेकपा गण्डकी प्रदेशले जनयुद्ध दिवस मनाउने भएको छ । विहीबार सपथ लिएलगत्तै बसेको नव गठित नेकपा गण्डकी प्रदेशको बैठकले तत्कालिन नेपाल कम्युनिष्ट पार्टीले जनयुद्ध शुरु गरेको दिन फागुन १ गते जनयुद्ध दिवस मनाउने निर्णय गरेको हो ।

बैठकमा सहभागी एक बरिष्ठ सदस्यले भने, ‘जनयुद्ध दिवसलाई भव्य रुपमा मनाउने निर्णय भएको छ, तर कहाँ र कसरी मनाउने बारे पदाधिकारी बैठकले तय गर्न बैठकले जिम्मेवारी दिएको छ ।’

त्यस्तै बैठकले स्ववियु चुनावलाई आफ्नो पक्षमा पार्नका लागि जिल्ला जिल्लामा गएर माहोल सृजना सदस्यहरुलाई निर्देशन दिएको छ भने पार्टीका केन्द्रीय सदस्य तथा प्रदेश सदस्यहरुलाई जिल्ला कमिटी निर्माणका लागि अनुकुल वातावरण निर्माण गर्नका लागि खटिन पनि निर्देशन दिएको स्रोतले बताएको छ ।अनलाइनखबरबाट