सडकमा माइकिङ गर्दै औषधी बेच्ने चार जनालाइ सोमवार प्रहरीले नियन्त्रणमा लिएको छ ।
हरमटारीचोकमा बसेर दाँत सफा गर्ने झोल र पाउडर बेचिरहेका उनीहरुलाइ सोधपुछका लागी नियन्त्रणमा लिइएको डिएसपी महेन्द्र नेपालले बताए । लम्जुङकी १७ बर्षिया बिना अधिकारी, १८ बर्षिय सौगात अधिकारी, बाकेका २६ बर्षिइ बुद्धिराम खत्री र २० बर्षिय अमृत बुढा प्रहरी नियन्त्रणमा छन् । उनीहरुको साथमा कला आयुर्वेदिक औषधालय जोरपाटी काठमाडौको परिचयपत्र रहेको नेपालले  जानकारी दिए । ‘परिचयपत्र र कम्पनीको पान नम्वर पनि रहेछ, तर उनीहरुले बेच्ने औषधी कस्तो हो र यसरी बेच्न पाउने नपाउने भन्ने बारे सोधपुछ गर्न नियन्त्रणमा लिएका हौ,’ उनले भने । औषधी व्यवसायी संघ गोरखाका अध्यक्ष संगम श्रेष्ठले औषधी व्यवस्था बिभागको अनुमति बिना खुल्ला रुपमा औषधीजन्य पदार्थ बेच्न नपाइने बताए ।