गोरखा ः शिक्षा ऐन विपरित पालुङटार नगरपालिका–९  मिरकोटको त्रिवेणी माविले विद्यार्थीसँग मासिक शुल्क असुल्दै आएको छ ।
नेपालको संविधानको धारा ३१ मा शिक्षाको मौलिक हक सम्बन्धि आधारभूत तह सम्म निशुल्क र अनिवार्य तथा मावि तहसम्म निशुल्क शिक्षाको व्यवस्था गरिएको छ । तर त्रिवेणी माविले शिक्षा नीतिलाई लत्याउदै कक्षा नर्सरी देखि पाँच सम्मका बिद्यार्थीसँग शुल्क लिने गरेको छ । २०६९ साल देखि नै शुल्क लिदै आएको बिद्यालयका प्रधानाध्यापक चुडामणी अधिकारी स्वीकारछन् । मावि कक्षा सम्म संचालनमा  रहेको उक्त बिद्यालयमा कक्षा नर्सरी देखि पाँच सम्म कुल २ सय २४ जना बिद्यार्थी छन् । बिद्यालयले उनीहरुसँग मासिक ६० रुपैयाका दरले शुल्क उठाउदै आएको छ । मासिक शुल्क वापत बिद्यालयले बार्षिक एक लाख ६१ हजार २८० रुपैया संकलन गर्छ ।
गत बर्ष बिद्यालयले मासिक शुल्क वापत रु ७ सय देखि ९ सय सम्म लिएको थियो । नर्सरी र केजीका बिद्यार्थीसँग सात सय, एक कक्षाका बिद्यार्थी सँग आठ सय र दुइ कक्षाका बिद्यार्थीसँग नौ सय शुल्क लिएको प्रअ अधिकारी आफै बताउछन् । ‘पोहोर साल सेक्सन छुट्याउनपर्ने भयो, फर्निचर पनि थिएन, त्यसैले बिद्यार्थीसँग एक महिना सात सय देखि नौ सय शुल्क लियौ, त्यसपछि फेरि महिनाको ६० रुपैया मात्र लिन थाल्यौ,’ उनले भने । पालुङटार नगरपालिकाका नगर शिक्षा शाखा अधिकृत शित्तल पाण्डेले सामुदायिक बिद्यालयले कुनै पनि वहानामा विद्यार्थीसँग शुल्क लिन नपाउने बताएका छन् ।
‘मावि सम्म निशुल्क शिक्षा हो, अतिरिक्त कक्षा संचालन गरेमा केही शुल्क लिन मिल्छ तर बिद्यालयकै समयमा पढाए वापत कुनै शुल्क लिन पाइदैन, ऐनले पनि दिदैन,’ उनले भने । निशुल्क शिक्षा पाउनुपर्ने मौलिक हकभएपनि बिद्यालयले ऐन विपरित शुल्क लिदा अभिभावक तथा बिद्यार्थी मर्कामा परेका छन् । बिद्यालयले भने अंग्रेजी माध्यम संचालन गरेकाले शुल्क लिएको बताउदै आएको छ ।  ‘नर्सरी देखि कक्षा पाँच सम्म अग्रेजी माध्यम चलाएका छौ, एक जना शिक्षक नीजिमा राखेका छौ, त्यसैले शुल्क उठाएका हौ,’ उनले भने ।