केशव गुरुङ

गोरखा ः पालुङटार नगरपालिकाको लिगलिगकोटमा संग्रहालय निर्माणका लागी एक करोड रकम बिनियोजन भएको छ ।
गण्डकी प्रदेशले आइतवार आगामी आर्थिक बर्ष २०७६÷७७ को बजेट सार्वजनिक गर्दै संग्रहालय निर्माण गर्न उक्त रकम विनियोजन गरेको बताएको छ । नेपाल राज्य स्थापनाको उद्गम थलो लिगलिगकोटमा ऐतिहासिक संग्रहालय स्थापना गर्ने गुरुयोजना प्रदेश सरकारले यस अघि नै बनाइसकेको थियो । सोही             आधारमा आगामी आर्थिक बर्षका लागी एक करोड रकम विनियोजन गरिएको गण्डकी प्रदेशका आर्थिक मामिला मन्त्री किरण गुरुङले  बताए । प्रदेश भित्रका दरौदी लगायतका नदीमा तटवन्धन निर्माण तथा नदी व्यवस्थापन गर्न ३९ करोड विनियोजन गरिएको उनले जानकारी दिए । श्रमिक तथा जोखिममा परेका बालबालिका तथा हिंसा प्रभावित व्यक्तिको पूनस्र्थापना केन्द्र स्थापना गर्न गोरखा लगायत अन्य जिल्लामा गरी कुल एक           करोड रकम छुट्याइएको छ । आधारभुत खानेपानी नपुगेको गाउँबस्तीमा खानेपानी पु¥याउन एक घर एक धारा कार्यक्रमलाई निरन्तरता दिन र सबै जिल्लाको जिल्ला प्रोफाइल तयार पार्नका लागि रु २ अर्व २० करोड बजेट विनियोजन भएको छ ।
राष्ट्रिय प्रशारण लाइन तत्काल पु¥याउन नसकिने तथा हाल सम्म बत्ती बाल्न आधुनिक उर्जाको पहुँच नपुगेको गोरखा लगायतको अन्य जिल्लाका १५ सय घरधुरीलाई सहुलियत दरमा नेट मिटरिगमा आधारित सौर्य उर्जा प्रविधिको जडान गर्न रु ६ करोड विनियोजन गरिएको छ । भौगोलिकरुपमा अति विकट र विकासका दुष्टिले पछाडि परेका गोरखाको चुमनुम्ब्री र धार्चे लगायतको क्षेत्रको पूर्वाधार विकास निम्ति आवश्यक बजेट विनियोजन गरेको गुरुङको भनाई छ । प्रदेश पर्यटक आकर्षक क्षेत्रको रुपमा घोषणा भएका ११० पर्यटन गन्तव्य मध्ये प्रत्येक जिल्लामा ४ गन्तव्यको छनौट गरी जम्मा ४४ गन्तव्यमा पूर्वाधार विकास गर्न १७ करोड ६० लाख विनियोजन गरिएको छ ।
गोरखा लगायत अन्य क्षेत्रमा उन्नत जातका स्याउको विरुवा वितरण गर्न रु ४ करोड ५० लाख विनियोजन गरिएको छ । मृगौला पीडित बिरामीलाइ गोरखा सहित अन्य जिल्लामा डायलासिस सेवा संचालन गर्न समेत रकम विनियोजन गरिएको गुरुङले               बताए । स्थानीय तहसँगको समन्वयमा प्रत्येक गाउँपालिकामा एक स्थानीय तह एक खेलमैदान र नगरपालिकामा रंगशाला निर्माणका लागी चार करोड ४० लाख रकम बिनियोजन गरिएको छ । गोरखा, मनाङ र मुस्ताङमा विपद उद्धार केन्द्र स्थापनाका लागी एक करोड ५० लाख रकम छुट्याइएको छ । गण्डकी प्रदेशले आगामी आर्थिक वर्षका लागि २०७६÷७७ का लागि ३२ अर्ब १३ करोडको बजेट ल्याएको हो । आइतबार प्रदेश सभा बैठकमा मन्त्री गुरुङले ३२ अर्ब १३ करोड ४७ लाख ९२ हजारको बजेट पेश गरेका हुन् । बजेटले पर्यटन, कृषि, जलस्रोत र उत्पादनमुलक उधोग क्षेत्रको विकास, स्वास्थ्य शिक्षा क्षेत्रमा प्राथमिकता राखेका छ ।

---

---