सवारी दुर्घटना बढ्यो
सवारी दुर्घटना बढ्यो
केशव गुरुङ
गोरखा ः गत बर्षको तुलनामा यस बर्ष जिल्लामा सवारी दुर्घटना बढेको छ । गत आर्थिक बर्ष २०७४÷७५ मा २३ वटा सवारी दुर्घटना भएपनि चालु आर्थिक बर्ष २०७५÷७६ को असार ६ गते सम्म सवारी दुर्घटनाको संख्या ३२ पुगिसकेको छ ।
यस बर्ष सवारी दुर्घटनामा परी १४ जनाको ज्यान गएको जिल्ला ट्राफिक प्रहरी कार्यालय गोरखाले जनाएको छ । मत्यु हुनेमा १२ पुरुष र २ बालक रहेको ट्राफिक कार्यालयका असई इन्द्रजंग थापाले बताए । यस बर्ष दुर्घटनामा परी ३४ जना गम्भिर र २० जना साधारण घाइते भएको उनले जानकारी दिए । सबैभन्दा बढि मोटरसाइकल दुर्घटना रहेको कार्यालयले जनाएको छ । ‘९ वटा मोटरसाइकल, ८ वटा ट्याक्टर, ७ वटा ट्रक÷ ट्याङकर, ५ वटा बस, २ टिप्पर, र १÷१ माइक्रो, जिप÷कार दुर्घटना भएको हो,’ थापाले भने । साघुँरो सडक तर सवारी चाप बढि भएका कारण दुर्घटना दर बढेको थापाले बताए । चालु आर्थिक बर्षको असार ६ गतेसम्म ट्राफिक कार्यालयले ६५ लाख ४१ हजार राजश्व सकंलन गरिसकेको छ । ट्राफिक नियम उल्लघंन गर्ने ९ हजार ६ सय सवारीलाइ कारवाही गरी उक्त राजश्व संकलन गरिएको ट्राफिक टिका शर्माले बताए ।
सवैभन्दा बढि ३ हजार ११५ ट्रक कारवाहीमा परेका छन् । उक्त ट्रकबाट २० लाख ७३ हजार राजश्व संकलन भएको छ । त्यस्तै १ हजार ९०६ कार÷जिप÷भ्यान कारवाहीमा परेका छन् । उनीहरुबाट १२ लाख ९१ हजार राजश्व संकलन भएको ट्राफिक शर्माले जानकारी दिए । कारवाहीमा परेका १ हजार ९३७ मोटरसाइकलबाट १२ लाख ६० हजार राजश्व संकलन भएको छ । यस बर्ष १ हजार ७२५ ट्याक्टर कारवाहीमा परेका छन् । उनीहरुबाट ११ लाख ६५ हजार राजश्व संकलन भएको छ । त्यस्तै कारवाहीमा परेका ९ सय १७ बस÷मिनिबसबाट ५ लाख ७० हजार राजश्व संकलन भएको ट्राफिक कार्यालयले जनाएको छ ।
गत आर्थिक बर्ष ११ हजार सवारीलाइ कारवाही गरी कुल ७१ लाख ६० हजार राजश्व संकलन भएको ट्राफिक शर्माले जानकारी दिए ।
