गोरखा दरवार पुनर्निर्माणमा ढिलासुस्ती भइरहेको छ । ठेकेदारको लापरवाहीले काम शुरु भएको डेढ बर्षमा जगको काम मात्र सकिएको छ । काममा भएको ढिलासुस्ती प्रति नियमन निकायको पनि ध्यान पुग्न सकिरहेको छैन । दरवार पुननिर्माणमा भएको ढिलाइका कारण भक्तजनको संख्यामा पनि कमी भएको छ । पुननिर्माणको कामलाइ तिव्रता दिन सबैको पहल आवश्यक देखिन्छ ।
गोरखा दरबारलाइ धार्मिक, ऐतिहासिक र पुरातात्विक स्थलका रुपमा लिने गरिन्छ । दरबारलाइ पर्यटनको स्थलको रुपमा विकास गर्ने प्रशस्त अवसर छन् । तर आवश्यक पूर्वाधार र प्रचार प्रसारको अभावले सोचे अनुरुप सफलता हासिल गर्न सकिएको छैन । जिल्लामा पर्यटन प्रवद्र्धनको मुख्य धरोहर मध्य एक हो गोरखा दरवार । तर त्यही दरवार पुननिर्माणमा भएको ढिलाइ प्रति सरोकारवालाको चासो नपुग्नु दुखद  हो । यसले जिल्लाको पर्यटन प्रवद्र्धनमा समेत प्रभाव पारिरहेको छ । काममा भएको ढिलासुस्तीका कारण तोकिएकै समयमै काम सम्पन्न नहुने पक्का छ । दरबार पुननिर्माणको ढिलाइले गर्दा दैनिक दरबार आउने भक्तजनहरु मन खिन्न भएर फर्कन् बाध्य छन् । यसले आन्तरिक तथा बाह्यक पर्यटकहरुमा नकरात्मक सन्देश प्रवाह समेत भइरहेको छ । यसको असर भक्तजनको संख्यामा देखिएको छ । भक्तजनमा कमी आउनु भनेको जिल्लाको व्यापार व्यवसायमा पनि असर पर्नु हो ।
दरबार पुननिर्माणलाई तिव्रता दिन सबै एकजुट भएर लाग्नुपर्छ । विशेष गरी सम्बन्धित निकायका व्यक्तिहरु अनुगमनका लागि निरन्तर फिल्डमा खटिनु जरुरी छ । पुननिर्माणको ढिलाई बारे समस्याको समाधान खोजी गरी सबै एकजुट भएर लाग्न सकेमा पनि समस्या हल हुन सहयोग पुग्ने थियो । स्थानीय, जनप्रतिनिधि तथा तीन तहका सरकारबीच आवश्यक समन्वय, सहकार्य गरी दरबार पुननिर्माणलाई तिव्रता दिनसक्नुपर्छ ।