गोरखा ः सत्तारुढ नेपाल कम्युनिष्ट पार्टी (नेकपा) गोरखाको इञ्चार्जमा कृष्ण धिताल (विजय) चयन भएका छन् ।
आइतबार वसेको नेकपाको सचिवालय वैठकले साविकको माओवादीको पोलिटब्युरो सदस्य समेत रहेका धिताललाई इन्चार्जको जिम्मेवारी दिएको हो । सह–इन्चार्जमा तिन जना चयन भएका छन् । साविकको माओवादीबाट  परशुराम रम्तेल र शुसिला सिंखडा तथा साविकको एमालेबाट चुडामणी जंगलीलाई सह–इन्चार्जको जिम्मेवारी दिइएको  हो । एमालेको तर्फ बाट सह–इन्चार्ज वनेका जंगली कास्कीका हुन् । केन्द्रिय सदस्यलाई मात्र इन्चार्ज र सह–इन्चार्ज वनाउने पार्टीको प्रावधान अनुसार कास्कीका जंगलीलाई गोरखाको जिम्मेवारी दिइएको नेकपाका एक नेताले बताए । मनाङ जिल्ला इन्चार्जको जिम्मेवारी भने गोरखाका रामशरण वस्नेतले पाएका छन् । लमजुङ सह–इन्चार्जको जिम्मेवारी पनि गोरखाका अमर तमुलाई दिइएको छ ।
वस्नेत साविकको एमाले र तमु साविकको माओवादीका नेता हुन् । तत्कालिन एमाले र माओवादी एकता पछि बनेको नेकपाले आइतबार जिल्ला कमिटि सरह मान्यता प्राप्त ६ महानगर सहित १८ जिल्लाका सहइन्चार्ज वाहेक ७७ वटै जिल्ला कमिट र महा  नगरपालिकाको नेतृत्व टुंग्याएको हो ।
यस अघि भागवण्डाको  आधारमा जिल्ला अध्यक्षमा तत्कालिन माओवादीको तर्फबाट लेख वहादुर थापा र सचिवमा तत्कालिन एमालेको तर्फबाट प्रेम गुरुङ चयन भइसकेका छन् । पार्टी एकता भएको झण्डै एक वर्ष पछि नेकपाले जिल्ला नेतृत्व टुङ्गाएको हो । गोरखाको दुई नगरको भने नेतृत्व टुङ्गो लागिसकेको छैन । छलफल गरेर चाडै नेतृत्वको चयन गर्ने धितालले बताए ।