गोरखा ः गोरखा नगरपालिकाले नगरक्षेत्र भित्रका १२ वटा विद्यालयका २५ जना विद्यार्थीलाई नगरप्रमुख छात्रवृत्ति प्रदान गरेको छ ।
सोमवार नगरपालिकाको कार्यालयमा आयोजित एक कार्यक्रमका बिच सामुदायिक विद्यालयबाट छनौट भएका विद्यार्थीहरुलाई छात्रवृत्ति स्वरुप जनही १० हजार नगद प्रदान गरिएको हो । १२ माध्यमिक विद्यालयबाट एक÷एक जना, जनजाती ५, दलित र अन्य ४÷४ जना गरी कुल २५ जना विद्यार्थीलाइ छात्रवृत्ति पू्दान गरिएको नगरपालिकाले जनाएको छ ।
यस्तै नगरपालिकाले नगरक्षेत्र भित्रका विद्यालयको समस्या, पठनपाठनको स्तरवृद्धी लगायतका लागि ८ जना शिक्षकलाई प्रोत्साहन रकम बितरण गरेको छ । शिक्षा क्षेत्रको अवस्था, समस्या, सुधार लगायत बिभिन्न विषयमा लघु अनुसन्धान गरेका आठ जना शिक्षकलाई जनही आठ हजार पाँच सय रुपैयाँ बितरण गरिएको हो । कार्यक्रममा लघु अनुसन्धान गर्ने शिक्षकहरुले विद्यालय शिक्षाका  बारेमा गरेका अध्ययन अनुसन्धानको कार्यान्वयन गर्न  सरोकारवालाहरुले नगरपालिकालाई सुझाब दिएका थिए । सोही अध्ययनलाई आधार बनाएर आउँदो वर्षको योजना, नीति कार्यक्रमलाई प्राथमिकता दिएको नगरपालिकाले बताएको छ । नगरपालिका शिक्षा शाखा प्रमुख भरतकाजी अर्यालको अध्यक्षतामा कार्यक्रम भएको थियो ।