काममा लापरवाही गरेको भन्दै बाह्र किलो(बारपाक सडकखण्ड निर्माण कार्यको जिम्मा पाएका मध्य नागर्जुन त्रिशुली जेभिको ठेक्का तोडियो । सडक बिभागले गरेको यो कार्य प्रशंसनिय नै  छ । उक्त निर्माण कम्पनीलाइ यस अघि नै कारवाही गर्नुपर्ने थियो । काममा लापरवाही गर्ने, सम्पर्कमा नआउने र काम अलपत्र  पारेर छाड्ने नागर्जुन त्रिशुली जेभि जस्ता निर्माण कम्पनीलाइ कारवाही गर्न सरकार चुक्नु हुदैन । होइन भने बिकास निर्माणको कामले अपेक्षा अनुसारको फड्को मार्न सक्दैन ।
जिल्लामा भइरहेका अन्य बिकास निर्माणका कामहरुमा पनि निर्माण कम्पनी र ठेकेदारको लापरवाही प्रष्ट देखिन्छ । कामको जिम्मा लिने तर समयमै काम नसक्ने, योजनाहरु अलपत्र छाड्ने र सम्पर्क विहीन हुने प्रवृति जिल्लामा हावी हुदै छ । यसको प्रमुख कारण लापरवाही गर्ने निर्माण कम्पनी र ठेकेदारलाइ कारवाही नहुनु । कतिपय सम्बन्धित कार्यालयको ठेकेदार सँगै मिलेमतो पनि हुने गरेको छ । अनि कारवाहीमा चुक्नुपर्ने बाध्यता । जसका कारण काम नगर्ने ठेकेदारले प्रश्रय पाउने नै भए । जिल्लाको विकास निर्माणमा महत्वपुर्ण भूमिका खेल्ने धेरै योजनाहरु सरकारको फितलो अनुमगनका कारण अलपत्र अवस्थामा छन् । काम नगर्ने निर्माण कम्पनीलाइ बारम्वार म्याद थप हुन्छ तर कारवाही हुदैन । पहुँचवाला र राजनितिक प्रभावमा परेर बिकास निर्माणको ठेक्का दिनु हुदैन । कमिसनको खेलमा लाग्नेहरुको पनि कमी छैन जिल्लामा । यस्तो गलत प्रवृतिको अन्त्य हुनु पर्छ ।
ढिलै भएपनि कारवाहीको सुरुवात भएको छ । यसले निरन्तरता पाउनु जरुरी छ । यसरी नै काममा लापरवाही गर्ने ठेकेदार र निर्माण कम्पनीलाइ कारवाही गर्न सरकारले खुट्टा नकमाउने हो भने पक्कै नै जिल्लाको बिकासले फड्को मार्ने थियो की !