गोरखा ः ७० करोड खर्चेर कालोपत्रे गरिएको लुइटेल भञ्ज्याङ सडकखण्ड एक महिना नबित्दै भत्किएको छ ।
लुइटेलगाउँ देखि चित्रेपोखरी सम्मको पहिलो खण्ड अन्तरगत पर्ने सडक ठाउँठाउँमा भासिएको स्थानीयले बताएका छन् । ‘सडक बनाएको एक महिना पनि भाको छैन भत्किन थालिसक्यो,’ सिरानचोक गाउँपालिका–३ ठानीस्वाँराका स्थानीय इश्वर लम्सालले भने, ‘कतै भासिने कतै लच्किने भएको छ, ठेकेदारले कस्तो काम ग¥यो खै !’ उक्त सडकखण्ड अन्तरगत पर्ने सिरानचोक गाउँपालिका वडा नम्वर ३ र ४ को बिभिन्न ठाउँमा सडक भत्किएको उनले बताए ।

‘चिउरीबोटमा ग्याभिन वाल नै भत्किएर सडक भासिएको छ, सबैभन्दा बढि भत्किएको यही हो,’ स्थानीय अशोक गुरुङले भने । भत्किएको सडकमा सवारी आवागमनमा समेत समस्या भएको उनले बताए । चिउरीबोट मात्र होइन थुम्की र साततलेमा समेत सडक भत्किएको र ठाउँठाउँमा ‘ग्याभिन वाल’ वगाएको स्थानीयले गुनासो गरेका छन् ।

---

---

भूकम्पीय आपतकालीन सहायता परियोजना अन्तरगत एशियाली विकास वैंकको ७० करोड र स्वीस सरकारको प्राविधिक सहयोगमा लुइटेल भञ्ज्याङ देखि भच्चेक सम्मको     करिव ३० किलोमिटर सडक कालोपत्रे भएको हो ।

दुइ खण्डमा बिभागन गरी ठेक्का लगाइएको उक्त सडकको पहिलो खण्डको काम लामा अमर जेभी कन्स्ट्रक्शनले पाएको थियो । पहिलो खण्ड अन्तरगत १७.६ किमि सडक पर्छ । उक्त सडक कालोपत्रेका लागी ४० करोड ४१ लाखमा ठेक्का सम्झौता भएको राष्ट्रिय पुननिर्माण प्राधिकरण  अन्तरगत अनुदान व्यवस्थापन तथा स्थानीय पूर्वाधार इकाइ गोरखाले जनाएको छ । १२.९७ किलोमिटरको दोस्रो खण्डका लागी २९ करोडमा लामा कन्स्टूक्सन सँग ठेक्का सम्झौता भएर काम भएको इकाइका इन्जिनियर शैलेन्द्र भट्टले बताए ।

दोस्रो खण्ड भन्दा पहिलो खण्डमा बढि समस्या आएको स्थानीयले बताएका छन् । ‘ग्याभिन वाल पनि गतिलो लगाएको छैन, ठाउँठाउँमा पहिरिएर सडक भासिएको छ, नाला पुरिएको छ । कालोपत्रे पनि देख्नको मात्रै छ, गाडीले ब्रेक लगायो भने भत्किएला जस्तो,’ पालुङटार नगरपालिका–४ का स्थानीय सुन्दर बिश्वकर्माले   भने । ठेकेदारले काममा लापरवाही गरेको भन्दै उनले आक्रोश समेत व्यक्त गरे ।

‘सडक बनाउन भनेर घर उक्लिने सिढी भत्काइदिए, अहिले सिढी पनि हाल्देनन्, घर उक्लिनै समस्या छ,’ सिरानचोक गाउँपालिका–३ सापकोटा गाउँका स्थानीय मिठुराम दमाइले भने । घरै अगाडी काम अधुरो गरेको ठानीस्वाँराका हर्मीका टेक बहादुर नेपालीको गुनासो छ ।
‘खोपिल्टो छ, ठाउँठाउँमा भासिएको छ, नाली पनि गतिलो बनाएको छैन, नाली छुने गरी कालोपत्रे गरदेउ भन्दा पनि मानेनन्,’ उनले भने । अनुगमनका लागी आएको टोलिले पनि राम्र्ररी अनुगमन नगरेको उनले गुनासो गरे ।

राष्ट्रिय पुननिर्माण प्राधिकरण अनुदान व्यवस्थापन तथा स्थानीय पूर्वाधार बिकास इकाइका गोरखा प्रमुख रामशरण आचार्यले भत्किएको सडक मर्मतका गर्न ठेकेदारलाइ भनिसकेको बताए । ‘ठेकेदारालाइ ओर्क अडर दिइसकेका छौ, मर्मतको काम भइरहेको छ,’ उनले भने । सिरानचोक गाउँपालिका(३ चिउरीबोटमा गएको पहिरो हटाउने काम भोली बाट शुरु हुने उनले दावी गरे ।

पहिरोका कारण दुइ साता देखि उक्त सडकखण्डमा सवारी आवागमन ठप्प छ । यातायात ठप्प हुदा स्थानीयले समस्या  भोग्नुपरेको छ । उक्त सडकखण्डबाट पालुङटार नगरपालिका, सिरानचोक र अजिरकोट गाउँपालिकाका स्थानीय लाभान्वित छन् । तर गुणस्तरीय काम नभएपछि स्थानीय चिन्तित देखिन्छन् ।