काठमाडौं । नेपाली क्रिकेट टिमका सदस्य सोमपाल कामी र सन्दीप लामिछाने यतिबेला क्यानडामा चलिरहेको ग्लोबल टि–ट्वान्टी क्रिकेट लिग खेलिरहेका छन् । सोमपाल पहिलोपटक विदेशी लिग खेलेका हुन् भने सन्दीपले गत संस्करण पनि यो लिग खेलेका थिए ।

जारी लिगमा दुबै खेलाडीले खराब प्रदर्शन गरेका छन् । डेब्यू खेलमा राम्रो प्रदर्शनको अपेक्षा गरेका सोमपालका लागि बिर्सनलायक रह्यो । सन्दीपले भलै १ विकेट लिए पनि शानदार बलिङ गर्न भने सकेनन् । विनीपेग होक्समा आवद्ध सोमपालले एडमोन्टन रोयल्सविरुद्ध खेल्दै विदेशी लिगमा डेब्यु गरे । न त बलिङ न ब्याटिङ दुबैमा चुके सोमपाल ।

यस संस्करणमा टोरन्टो नेशनल्समा आवद्ध सन्दीपले पनि ब्राम्पटन बुल्भसँग आफनो पहिलो खेल खेल्दा सम्झनलायक प्रदर्शन गर्न सकेनन् । ४ ओभर बलिङ गरेका सन्दीपले १ विकेट लिएर ४४ रन खर्चिए । भारतीय क्रिकेटर युवराज सिँहको कप्तानीमा रहेको टोरन्टो बुल्भसँग ११ रनले पराजित भयो ।  पराजित भएपछि सोमपाल आबद्ध होक्स अंकतालिकाको चौथो स्थानमा छ । ५ खेलमा २ मा जित र ३ मा हार बेहोरेको होक्सको ४ अंक छ  । सन्दीपको टोरन्टो ४ खेलबाट २ अंक जोड्दै पाचौं स्थानमा छ ।

सन्दीप र सोमपाल सिंगापुरमा भएको आईसीसी टि–ट्वान्टी एशिया छनोटपछि क्यानडा पुगेका हुन् । सिंगापुरमा खराब प्रदर्शनमा गुज्रिएका दुबै खेलाडीले लिगमा पनि सम्झनलायक प्रदर्शन गर्न सकेनन् । by baahrakhar