रेडक्रसले बाँडेको बोका गाउँलेले मासु खाए !
रेडक्रसले बाँडेको बोका गाउँलेले मासु खाए !
जीविकोपार्जनका लागि भन्दै नेपाल रेडक्रस सोसाइटीले वितरण गरेको वोयर बोका काटेर गाउँलेले मासु खाएका छन् ।
सिरानचोक गाउँपालिका–३ हर्मीका प्रकाश अधिकारीलाई दिइएको वोयर बोका वुधवार वडाध्यक्षसहित स्थानीयले मिलेर काटेका हुन् ।
‘प्रकाशले गाउँको समूह–फाइनान्स सबैबाट ऋण लिएको रहेछ,’ वडाध्यक्ष वीरबहादुर थापाले भने, ‘घरमा बुढी आमालाई छाडेर ऋण तिर्न नसकेर भागेछ, अनि गाउँलेले घरमा पालेको सबै गाईवस्तु लिलामी गरे र त्यही बोका पनि लगेर काटेका हुन् ।’
उक्त बोका काट्दा १४ हजार रुपैयाँ उठेको उनले बताए । संकलित रकमको केही अंश अधिकारीको आमालाई दिने उनले बताए । सबैसँग सल्लाह गरेर बोका काटेर मासु बेचेको उनले जानकारी गराए ।
‘अध्यक्षले भनेर हामीले हाम्रो कम्पाउण्डमा काट्न दिएका हौ,’ इलाका प्रहरी कार्यालय हर्मीका इन्चार्ज केशबहादुर पौडेलले भने, ‘भाग लगाएर घरघरमै लैजानुभयो ।’
जीविकोपार्जनका लागि दिएको बोका काटेर मासु खाएपछि रेडक्रसले आपत्ति जनाएको छ । ‘अरु जातको बोका भन्दा यो जात चाँडै बढ्छ, मासु धेरै लाग्छ भनेर गुल्मी र अर्घाखाँचीबाट ल्याएर वितरण गरेको काटेर खाएछन्, अब के भन्ने,’ रेडक्रस गोरखा शाखा सभापति भगवानबाबु मास्केले भने ।
उक्त बोकाको ३० हजार रकम बराबरको बिमासमेत गरिएको उनले बताए । ‘आर्थिक अवस्था सुधार होला भनेर बाँडेको बोका वडाध्यक्ष आफै मिलेर काटेर खानुभएछ,’ उनले दुखेसो गरे ।
