गोरखा ः गोरखा नगरपालिका–७ नयाँबसपार्कमा निर्माण भइरहेको बहुउदेश्यीय सभाहलको ४० प्रतिशत काम सम्पन्न भएको छ ।

कुल ३४ करोड ९० लाख ४६ हजार लागतमा सभाहल निर्माण हुन लागेको संघिय आयोजना कार्यान्वयन इकाइ कास्कीका सवइन्जिनियर लक्ष्मण श्रेष्ठले बताए । ‘पार्किङ फ्लोरको ढलानको काम भइरहेको छ,’ उनले भने, ‘अन्डरग्राउण्ड पार्किङको लागी दुई फ्लोर प्रयोग हुन्छ ।’

---

---

१२  रोपनी क्षेत्रफलमा निर्माणाधिन उक्त हलमा सात सय ५० जना अट्न सक्ने उनले बताए । ‘चार वटा कोठा कन्ट्रोल रुम लगायत अन्य व्यवस्थापन कक्षको रुपमा प्रयोग हुन्छ, अर्काे चार कोठामा पसलहरु संचालन हुन्छन् । कार्यक्रममा आउने भिआइपी बस्नका लागी दुई वटा कोठा हुन्छन्,’ श्रेष्ठले भने ।

कुनै पनि कार्यक्रम वा सभा गर्न सहज हुने उदेश्यले सभाहल निर्माण भइरहेको उनको भनाइ छ । हल निर्माणका लागी रविना डाँफे जेवीसँग २०७४ माघ ३ गते सम्झौता भएको कार्यालयले जनाएको छ । २०७७ माघ २ गतेभित्र काम सम्पन्न गसिक्नुपर्ने बताइएको छ ।

अहिलेको गति अनुसार समयमै काम सम्पन्न नहुने भन्दै कामलाइ तिव्रता दिनुपर्ने श्रेष्ठले बताए । भवन निर्माण भएपछि स्थानीय तहलाइ हस्तान्तरण गर्ने कार्यालयले जनाएको छ ।

नयाँबसपार्कमा सभाहल निर्माण गरी डण्डीडाँडामा बसपार्क बनाउने योजनाका साथ काम भइरहेको छ ।