महायज्ञको नाममा श्रम शोषण
महायज्ञको नाममा श्रम शोषण
गोरखा ः जिल्ला सदरमुकाममा हुने भनिएको श्रीमदभागवत ज्ञान महायज्ञका लागी ‘स्टेज’ निर्माणमा खटिएका मजदुरको श्रम शोषण भएको खुल्न आएको छ ।
पारिश्रमिक नदिइ आयोजक भागेको उनीहरुले गुनासो गरेका छन् । श्रीमद्भागवत ज्ञान महायज्ञ मूल समारोह समिति परिवारको आडमा फेस नेपाल मिडियाले यही भदौ ३ देखि १० गते सम्म महायज्ञ गर्न लागेको थियो । महायज्ञका लागी सदरमुकामको हरमटारी खेलमैदानमा स्टेज बनाउने काम पनि शुरु भयो । पत्रकार सम्मेलन पनि गरियो ।
सबै अतिथिलाइ निमन्त्रणा समेत पठाएको आयोजक अन्तत महायज्ञको अघिल्लो दिन जिल्ला छाडेर भागेपछि मजदुरले ज्याला नपाएका हुन् । ‘दुइ दिन सम्म काम ग¥यौ, दिनको एक हजार ज्याला दिने भनेका थिए,’ स्टेज निर्माणको जिम्मा पाएका ठेकेदार कमल केसीले भने, ‘पहिलो दिन ५ जना र दोस्रो दिन ४ जना मजदुर ल्याएर काम लगाए तर आयोजकले पैसा दिएन ।’ मजदुरले आफूसँग ज्याला मागेर हैरान गरेको उनको गुनासो छ ।
‘पोल गाडेर लगभग स्टेज तयार गरिसकेका थियौ तर महायज्ञ हुने अघिल्लो दिन कार्यक्रम नहुने भयो भनेर सबै पोल उप्काएर गाडीमा लोड गराउन लगाए । सामान पु¥याएर फर्केपछि ज्याला दिन्छु भनेर गएका फेस नेपाल मिडियाका फणिन्द्र लामिछाने त्यसपछि देखा परेनन्,’ उनले भने ।
श्रीमद्भागवत ज्ञान महायज्ञ मूल समारोह समिति परिवारको नाम बिकाएर स्टेज निर्माण देखि कार्यक्रम गर्ने सबै जिम्मा लामिछानेले लिएका थिए । श्रम गराएर मजदुरलाइ पारिश्रमिक नदिएका लामिछानेले मजदुरको फोनलाइ वेवास्ता गर्दै आएका छन् ।
‘फोन ग¥यो भने एक घण्टी मै काट्नुहुन्छ, कहिले स्विच अफ गरेर राख्नुहुन्छ, कहिले काही फोन उठ्छ, पैसा माग्यो भने थर्काउनुहुन्छ,’ केसीले गुनासो गरे । यस बारेमा प्रतिक्रिया लिन लामिछानेलाइ सुरुवातबाट फोन सम्पर्क गर्दा मोवाइल स्विच अफ भएको पाइयो ।
महायज्ञमा पण्डित दीनवन्धु पाखरेलले कथा वाचन गर्ने भनेर प्रचार भएको थियो । महायज्ञ हुने अघिल्लो दिन पण्डित पोखरेल आफैले आयोजकले आवश्यक समन्वय नगरेको भन्दै तत्काललाइ महायज्ञ गर्न नसक्ने बताएका थिए ।
विना तयारी हचुँवाको भरमा फेस नेपाल मिडियाले महायज्ञको आयोजना गर्दा असफल भएको स्रोत बताउछ । महायज्ञका लागी जिल्लाका सरोकारवाला सँग आवश्यक समन्वय समेत नगरेको आरोप आयोजक माथि लागेको छ । ‘पैसा कमाउने मात्र उदेश्य राखे, आवश्यक तयारी गरेनन्, काम असफल भयो,’ स्रोत भन्छ ।
