३३ किलो अवैध निरमसी सहित गोरखाका दुइ जना पक्राउ परेका छन् ।
मस्र्याङदी गाउँपालिका–३ खुदीबजारबाट उनीहरुलाइ पक्राउ गरिएको प्रहरीले जनाएको छ । पक्राउ पर्नेमा बारपाक सुलिकोट गाउँपालिका–१ बारपाकका ४८ बर्षिय पूर्ण बहादुर गुरुङ र ३७ बर्षिय छम बहादुर गुरुङ रहेको जिल्ला प्रहरी कार्यालय लम्जुङले जनाएको छ । उनीहरुलाई बुधबार साँझ ६ बजे पक्राउ गरिएको डिएसपी रविन्द्रमान गुरुङले बताए । चेकजाँचको क्रममा पूर्णबहादुरको झोलामा ११ किलो र छमबहादुरको झोलामा २२ किलो निरमसी फेला परेको उनले जानकारी दिए । डीएसपी गुरुङका अनुसार उनीहरुले बिना पूर्जी अवैध रुपमा निरमसी संकलन गरेको देखिएको छ । मस्र्याङदी गाउँपालिका १ र २ को घनपोखराको लेकमा संकलन गरी ल्याएको उनीहरुले सोधपुछमा बताएको प्रहरीले जनाएको छ । करिब १ महिनासम्म लेकमा बसेर संकलन गरेर ल्याएको निरमसी उनीहरुले विक्री गर्न बेंसीसहर लैजाने क्रममा प्रहरीले फेला परेको हो ।सुकेको निरमसीलाई उनीहरुले ५ हजारदेखि ६ हजारसम्म विक्री गर्दै आएको प्रहरीलाई बताएका छन् । उनीहरुले घनपोखराको जंगलबाट संकलन गरेर ल्याएको भनेको र घनपोखरी अन्नपूर्ण संरक्षण क्षेत्र आयोजना (एक्याप) को संरक्षित क्षेत्रभित्र पर्ने भएकाले उनीहरुलाई कानुन बमोजिम कारबाहीको लागि एक्यापको जिम्मा लगाइने डीएसपी गुरुङले बताए । लेकमा पाइने निरमसी लोपोन्मुख एवं बहुमुल्य जडिबुटीको रुपमा लिइन्छ ।