सदरमुकाममै सडकको दुर्दशा
सदरमुकाममै सडकको दुर्दशा
गोरखा ः गोरखा आरुघाट सडकखण्ड अन्तरगत पर्ने गोरखा नगरपालिका–४ को बुढिखोलादेखि फिनाम एसमोडसम्मको सडक कालोपत्रेको काम तीन वर्षदेखि अलपत्र छ ।
४ किलोमिटर सडक कालोपत्रेका लागि २०७२ साल साउन ३१ गते काष्टमाण्डव कन्स्ट्रक्सन प्रालिसँग ठेक्का सम्झौता भएको हो । ०७४ मंसिर मसान्तभित्र काम सम्पन्न गरिसक्नुपर्ने थियो । तर, हालसम्म कालोपत्रेको काम सुरु भएको छैन ।
तीन करोड ३७ लाखमा ठेक्का लागेको उक्त सडकमा ठेकेदारको लापरवाहीले काम अलपत्र छ । ११ किलो छेवेटार भालुस्वाँरा बारपाक सडक योजना कार्यालय गोरखाले ठेकेदारको बचाउ गर्दै योजना नपरेका कारण काम हुन नसकेको बताएको छ ।
‘गत आर्थिक वर्ष पनि यसमा कुनै योजना परेन, चालु आवमा पनि छैन,’ कार्यालयका इन्जिनियर राजेशकुमार यादवले भने, ‘योजना नै नपरेपछि रकम हुँदैन कसरी काम गर्ने ?’ ग्राभेल र नालाको काम भने सम्पन्न भइसकेको उनले जानकारी दिए ।
सडक कालोपत्रे नहुँदा आउजाउमा समस्या भएको स्थानीय जनप्रतिनिधिको गुनासो छ । बिहीवार सडक कालोपत्रेको माग गर्दै उनीहरु प्रमुख जिल्ला अधिकारीकोमा पुगेका छन् ।
‘फिनाम देखि घ्याम्पेशाल सम्मको सडक पिच भइसक्यो तर सदरमुकामको मुखमै रहेको सडक अलपत्र छ, बाटोले हामी जनप्रतिनिधिलाई पनि गिज्याइरहेको जस्तो भान हुन्छ,’ गोरखा नगरपालिका वडा नम्वर २ का अध्यक्ष रहमतुल्ला मियाले भने ।
सडक कालोपत्रे नहुदा एम्वुलेन्स सम्म पनि चल्न कठिन हुने गरेको उनले गुनासो गरे । वडानम्बर १ का अध्यक्ष हिक्मतबहादुर कुवँरले सडक मर्मत नहुँदा यात्रुले दुःख पाउने गरेको बताए । ‘पानी पर्रुयो भने गाडी फिनाममै रोकिन्छ, अरु बेलामा पनि त्यो बाटोमा गाडीको पट्टा भाचिन्छ भनेर यात्रुले हिड्नुपर्ने बाध्यता छ,’ उनले भने ।
बाटोको विषयलाई लिएर दिनहुँ वडा कार्यालयका स्थानीय गुनासो गर्न आउने गरेको वडा नम्वर ४ का अध्यक्ष खोप बहादुर अधिकारीले बताए ।
‘वडामा आएर स्थानीयहरु आन्दोलन गर्छाै भन्छन्, हामीले थमाएर राखेका छौ,’ उनले भने, ‘कि काम नगर्ने ठेकेदारलाइ कालोसूचिमा राखेर ठेक्का तोड्नुप¥यो, होइन भने काम हुनुप¥यो ।’ बिहीबार प्रमुख जिल्ला अधिकारी सहित सडक कार्यालयका प्रमुख तथा अन्य सरोकारवालासँगको छलफलमा सदरमुकामको हरमटारी चोकदेखि फिनाम सम्मको सडक मर्मत गरिदिन पनि वडाध्यक्षहरुले माग गरेका छन् ।
यसअघि कालोपत्रे भइसकेको सडक अहिले ठाउँ ठाउँमा भत्किएको छ । आफूहरुको मागलाई वेवास्ता गरेर जनतालाई लिएर आन्दोलनमा उत्रिने उनीहरुले चेतावनी दिएका छन् । सडक कालोपत्रेका लागि अर्थ मन्त्रालयसँग रकम माग गरिएको सडक कार्यालयका प्रमुख रविन्द्रलाल दासले बताए ।
‘४ किलोमिटर सडक कालोपत्रेका लागि ६५ लाख र बाँकी रकम हरमटारी चोकदेखि फिनामसम्मको ३ किलोमिटर सडक मर्मतको लागि भनेर कुल एक करोड रकम मन्त्रालयसँग मागेका छौं, फाइल मन्त्रालय पुगिसक्यो, रकम आएपछि काम सुरु गर्छौ,’ उनले भने ।
