गोरखा ः लाप्राकको एकीकृत नमूना वस्तीमा हिमालको पानी वितरण हुने भएको छ ।
चराचुरुङ्गी हिमाल फेदीमा                रहेको मुहानबाट पानी ल्याइएको हो । भीर छिचोल्दै पाइप जोडेर वस्तीमा खानेपानी झारिएको छ । वस्तीबाट मुहान करिव १९ किमि पर पर्छ । कुल १२ ट्यांकी निर्माण गरिएका छन् । मुहानको भुल्मेचेत, दिलिङखर्क, मेम्छी भेंडाखर्क, लाम्रखर्क, हुम्चेखर्क, कैका भन्ज्याङ र गुप्सीपाखामा ५ सय लिटर देखि ८० हजार लिटर क्षमताको ट्यांकी निर्माण भएको स्थानीय सुक बहादुर गुरुङले बताए । मुहानदेखि वस्ती सम्म पाइप बिछ्याउने काम सहज नभएको उनी बताउछन् । ‘हिउँले गर्दा बाटो नै थिएन, बाटो बनाउँदै हिड्नुपथ्र्याे,’ उनले भने, ‘फेरि पाइप लान र बिछ्याउन उस्तै गाह्रो ।’ खर्क र गोठमा टेन्ट टाँगेर कामदार राखिएको उनले बताए । पाइप र सिमेन्ट हेलिकोप्टरबाट ढुवानी             गरेको उनी सम्झन्छन् । भूगोलका कारण काम गर्न सहज नभएको उनी बताउछन् ।
हिउँदमा गुप्सीपाखामै हिउँ पर्छ । हिमाल फेदीमा पानीको मुहान जम्छ । जाडोका बेला पाइपमै पानी जम्ने सम्भावना रहेको भन्दै स्थानीय चिन्तत छन् । ‘पानी नजम्न कस्तो प्रविधि अपनाउन सकिन्छ भनेर प्राविधिकसँग राय पनि लिन्छौं,’ गुरुङले भने । भीर छिचोल्दै पाइप जोडेर गुप्सीपाखामा खानेपानी झरेपछि स्थानीय खुसी छन् । पाखा आसपास टहरोमा बसेकाहरूले पानी प्रयोग गरिसकेका छन् । बस्तीमा ‘एक घर एक धारा’ जडान गरेपछि पानी विधिवत रुपमा          वितरण गरिने बताइएको छ । एकीकृत बस्तीको काम अन्तिम      चरणमा छ । ५७३ घरधुरीको बस्ती रहने पाखा आसपास आवश्यक पूर्वाधार पनि निर्माण जारी छ । सबै घरमा मिटर जडानपछि जडानपछि २४ सै घण्टा पानी वितरण हुने गुरुङले बताए ।