घैरुङमा बनाना क्याफे
घैरुङमा बनाना क्याफे
गोरखा ः शहिद लखन गाउँपालिका को घैरुङ स्थित कार्यालय नजिकै एउटा सानो टहरा छ ।
बोर्डमा लेखिएको छ ‘शहिद लखन वनाना क्याफे’ । स्थानीय नारायण प्रसाद रेग्मीले संचालन गरेको क्याफेमा केराका बिभिन्न परिकारहरु पाइन्छ ।माघ १ गतेबाट संचालनमा आएको क्याफेमा केराको मम, चिप्स, पकौडा, अचार लगायतका परिकार पाइने रेग्मी बताउछन् । केरा गाउँमै उत्पादन हुन्छ ।
रेग्मी आफैले तीन बर्ष देखि केरा खेति गर्दै आएका छन् । ‘१५ रोपनी आफ्नै जग्गामा केरा खेति गर्दै आएको छु,’ उनले भने, ‘समूह मिलेर छुट्टै ३५ रोपनी जग्गामा पनि केरा खेति गरेका छौ ।’
केराको परिकार बनाउन उनले कुनै तालिम लिएका छैनन् । इन्टरनेटको सहयोगले क्याफे संचालन गरेका उनले छोरीलाइ तालिम लिन पठाएका छन् ।
कैलाली पुगेर केराको परिकार देखेका उनलाइ गाउँमा क्याफे संचालन गर्ने रहर जागेको थियो । ‘कैलालीमा एक घरका सबै परिवारले वनाना क्याफे संचालन गरेको देखे, बिभिन्न परिकार देख्दा मलाइ पनि गाउँमै क्याफे खोल्ने उत्प्रेरणा मिल्यो अनि आएर शुरु गरे,’ उनले भने ।
गाउँ फर्केर उनले कृषि प्राविधिक सँग सल्लाह गरे । दार्चे केरा उत्पादन कृषक समूह गठन गरेर अनुदान रकम समेत पाए । कृषि कार्यालयबाट ६० हजार रकम अनुदान पाएको उनले बताए । परिकार बनाउनका लागी काचो केरा प्रयोग गरिने उनी बताउछन् । नयाँ परिकार भएकाले सबैले रुचाउने उनको बिश्वास छ ।
‘वडा र गाउँपालिकाको कार्यालयका कर्मचारी र गाउँका मान्छे आउछन्, होम डेलिभरीको पनि व्यवस्था गर्ने तयारी गरिरहेको छु,’ उनले भने ।
नयाँ परिकार र नयाँ स्वाद भएकाले क्याफे राम्रै संचालन हुने उनले अपेक्षा गरेका छन् । केरा खेतिलाइ थप बिस्तार गर्दै लैजाने योजना उनको छ । ब्राण्डको रुपमा स्थापित गराइ जिल्ला वाहिर पनि निर्यात गर्ने लक्ष्य रहेको उनले बताएका छन् ।
