गोरखा ः जिल्लाको साविक तीन गाविसमा पुष महिनाभित्र केन्द्रिय प्रशारण लाइनको बिजुली बल्ने भएको छ ।

भूकम्पको केन्द्रविन्दु बारपाक, सौरपानी र हंसपुरमा लाइन जडानको काम भइरहेको नेपाल बिद्युत प्राधिकरण गोरखा वितरण केन्द्रले जनाएको छ ।

---

---

‘सौरपानी र हंसपुरमा पोल राखेर तार टाँग्ने काम सकिसक्यौ,’ कार्यालय प्रमुख माधव न्यौपानेले भने, ‘बारपाकका लागी पोल राख्ने काम सकियो, तार टाँग्न बाँकी छ ।’ सौरपानी र हंसपुरमा दुइ÷दुइ वटा ट्रान्सफर्मर राखिएका छन् ।

‘सौरपानीमा   राखिएको ट्रान्सफर्मर ५० र १०० केभिए क्षमताको छ, हंसपुरमा   रहेको ट्रान्सफर्मर २५ र १०० केभिए क्षमताका छन्,’ उनले  भने ।

बारपाकमा चार वटा ट्रान्सफर्मर राखिएको बताउदै उनले थपे, ‘दुइ वटा १०० केभिए र दुइ वटा ५० केभिए क्षमताका छन् ।’ सरकारको ग्रामिण बिद्यूतीकरण कार्यक्रम अन्तरगत सो क्षेत्रमा केन्द्रिय प्रशारणको लाइन विस्तार गरिएको उनको भनाइ छ ।

सौरपानीका लागी ढोडेनी,  बारपाकका लागी वालुवा र हंसपुरका लागी नम्कीबाट लाइन विस्तार गरिएको कार्यालयले जनाएको छ । सो क्षेत्रका करिव दुइ हजार घरधुरी लाभान्वित हुने छन् ।