गोरखा ः जिल्लाका १३ वटा प्रहरी चौकी भवन पुननिर्माण भएका          छन् ।
२०७२ सालको भूकम्पका  कारण २२ वटा भवनमा क्षति पुगेको थियो । ९ वटा भवनको उद्घाटन भइसकेको जिल्ला प्रहरी कार्यालयले जनाएको छ ।

सोमवार नवनिर्मित दुइ भवन उद्घाटन भएका छन् । गण्डकी प्रदेश प्रहरी प्रमुख डिआइजी बिनोद शर्मा घिमिरेले  सिरानचोक गाउँपालिका–३ को इलाका प्रहरी कार्यालय हर्मी र पालुङटार नगरपालिका(९ को रातमाटे प्रहरी चौकी भवनको उद्घाटन गरेका  हुन् ।

---

---

एक करोड ९३ लाख ६९ हजार लागतमा इप्रका हर्मीको भवन निर्माण गरिएको जिल्ला प्रहरी प्रमुख एसपी ओम प्रसाद अधिकारीले बताए । २०७४ साल साउन २२ गतेबाट निर्माण कार्य शुरु भएको थियो । २०७६ साल असार २१ गते काम सम्पन्न भएको उनले जानकारी दिए । १ करोड ५५ लाख ७४ हजार लागतमा रातमाटे प्रहरी चौकी निर्माण भएको बताउदै एसपी अधिकारीले भने, ‘२०७४ साल बैशाख ६ गतेबाट काम शुरु भएको थियो, २०७५ माघ ५ मा               सकियो ।’

चौकी निर्माणका लागी स्थानीय पदम प्रसाद अधिकारीले केही जग्गा निशुल्क दान गरेका थिए । कार्यक्रमको अवसरमा उनलाइ सम्मान गरिएको छ । स्रोत सुनिश्चित नभएका कारण क्षति पुगेका बाकी भवनहरु पुननिर्माण हुन नसकेको एसपी अधिकारीले बताए ।

पुननिर्माणका लागी पहल भइरहेको उनको भनाइ छ । भवन उद्घाटन कार्यक्रममा बोल्दै गण्डकी प्रदेश प्रहरी प्रमुख डिआइजी घिमिरेले प्रहरी संगठनमा आवश्यक स्रोत साधन र प्रविधि नहुँदा समस्या भएको बताए । ‘जनशक्ति बढाउनु भन्दा पनि प्रविधि बढाउनु पर्ने आवश्यक छ,’ उनले भने, ‘तर हामीसँग सवारी साधान, प्रविधि सबै अभाव छ ।’

सिमित स्रोत साधनका बावजुद पनि शान्ति सुरक्षा कायम राख्न प्रहरी दिन रात खटिएको उनले बताए । प्रहरीको काम कारवाहीमा साथ दिन उनले स्थानीयलाइ आग्रह गरे ।