देशका तीन तहका सरकार तीन तिर हिँड्दा विकास निर्माणको काम प्रभावित बनेको भन्दै नागरिक अगुवा चिन्ता व्यक्त गरेका छन् ।

अनौपचारिक क्षेत्र सेवा केन्द्र (इन्सेक) को आयोजनामा भएको विकासका लागि नागरिक समाज तथा सञ्चार जगतबीचको सहकार्य विषयक अन्तरक्रिया कार्यक्रममा सहभागीले प्रतिफल पाउने बेला सोचे अनुसार विकास हुनै नसकेको बताए ।

---

---

जनप्रतिनिधि नागरिक समाजसँग नजिकिने भन्दा पनि टाढा हुँदै गएको आभास भएको साझा सभाका संयोजक तथा   वार एसोसिएसनका स्थानेश्वर दवाडीले बताए । ‘गोरखाको सन्दर्भमा हामीले जनप्रतिनिधिलाई घच्घच्याइरहेका छौँ । कति सफल कति असफल ? समीक्षा गरेर अघि बढ्नुपर्ने छ ।’–दवाडीले भने ।

सडक, विद्युत, खानेपानी जस्ता आधारभुत विकासका काम भएपनि निकै सुस्त तवरले भएकोमा  नागरिक अगुवाको असन्तुष्टी छ । मध्यपहाडी सडक, १२ किलो भालुस्वारा वारपाक सडक निर्माणको प्रगति र राष्ट्रिय गौरवको रूपमा रहेको आयोजना बुढीगण्डकी निर्माणको विषय अन्यौलमा हुनु दुखद् रहेको उनिहरुको तर्क छ ।

सङ्घीयतापछि देश विकासले सोचेअनुसार फड्को मार्न नसकेको गैरसरकारी संस्था महासङ्घका अध्यक्ष सिताराम श्रेष्ठले बताए । विकासको प्रतिफल पाउने बेला जनता दुःख र पिडामै रहेको उनले बताए । उनले भने–‘‘यसका लागि स्थानीय, प्रदेश र केन्द्र    सरकारलाई ध्यानाकर्षण गराउनुपर्ने देखेका छौँ ।’

नागरिक समाज र सञ्चार जगतले आफ्नो आवाज बुलन्द बनाउन नसके जुनकुनै सरकार झनै स्वेच्छाचारी हुँदै जाने सरोकारवाला बताउछन । नेपाल पत्रकार महासङ्घका अध्यक्ष किशोरजङ्ग थापाले तीन सरकार तीन तिर हिँड्ेको आरोप लगाउँदै स्थानीय, प्रदेश र सङ्घीय सरकार नागरिक समाज प्रति जबाफदेही नबनेको बताए ।

‘विकासका काममा जिम्मेवार बनाउन दबाबमुलक तवरले प्रस्तुत हुनुपर्ने आवश्यकता आएको छ,’उनले भने । जिल्लामा देखिएका विकृति बिसङ्गतिका विरूद्घ आवाज उठाउन सञ्चारकर्मी र नागरिक समाजले प्रशंसनीय भूमिका खेलेको मानव अधिकार तथा शान्ति समाजका उपाध्यक्ष सिताराम तिवारीले बताए ।

काम नगर्ने ठेकदार नै सम्मानित हुने गरेकोमा कार्यक्रमकी सहभागीले चिन्ता जनाए । मानव अधिकार सञ्जालका संयोजक यदु  अधिकारीको अध्यक्षतामा भएको कार्यक्रममा अधिकारकर्मी ऋषि खनालले कार्यपत्र प्रस्तुत गरेका थिए ।