धार्चे गाउँपालिका–५ गुम्दा स्थित यामगाउँका कृषकलाइ लक्षित गरी आधुनिक अलैची भट्टी संचालनमा ल्याइएको छ ।

पोखरी सहकारी संस्थाले उक्त भट्टी संचालनमा ल्याएको हो । ७ लाख ४९ हजार लागतमा अलैची सुकाउने भट्टी निर्माण गरिएको सहकारीका अध्यक्ष मान बहादुर गुरुङले बताए । ‘६ लाख ५० हजार रकम वडाले दिएको हो,’ उनले भने, ‘९९ हजार उपभोक्ता समितिबाट जुटायौ ।’

---

---

२०७५ सालबाट भट्टी निर्माणको काम शुरु भएको थियो । गत जेठ महिनामा निर्माण कार्य सम्पन्न भएपनि असोज महिनाबाट संचालनमा आएको उनले बताए । भट्टीमा अलैची सुकाउँदा श्रम र समयको बचत हुने र अलैची पनि              गुणस्तरीय हुने कृषकहरुले बताएका छन् ।

‘यस अघि अलैची घाममा सुकाउथ्यौ,’ गुरुङले भने, ‘अलैची कालो हुने, रंग नआउने र क्वालिटी पनि कम हुन्थ्यो ।’

घाममा अलैची सुकाउन झन्झट समेत हुने                गरेको उनले बताए । आधुनिक भट्टीमा अलैची सुकाउँदा प्राकृतिक रंग र वास्ना हुने र मूल्य पनि बढि आउने उनको भनाइ छ । उक्त क्षेत्रका अलैची खेती गर्ने किसानलाइ लक्षित गरी भट्टी संचालन गर्न सहयोग गरिएको वडाध्यक्ष तुल बहादुर गुरुङले       बताए । उक्त अलैंची भट्टी जिल्लाको पहिलो भएको उनको दावी छ ।

उक्त क्षेत्रका करिब ५० भन्दा बढी घरधुरीले करिब ९  सय रोपनी क्षेत्रफलमा अलैंची खेती गर्दै आएका छन् । स्थानीयले उत्पादन गरेको अलैची सहकारीले जिम्मा लिएर विक्रि वितरण गर्दै आएको छ ।

२०७१ सालमा २५ सय बेर्नाबाट शुरु गरेको अलैची खेती थप विस्तार गर्ने लक्ष्य रहेको सहकारीका अध्यक्ष गुरुङले जानकारी दिए ।