राष्ट्रिय पुनर्निर्माण  प्राधिकरणले भूकम्पबाट आंशिक तथा पूर्ण रूपमा क्षति भएका निजी आवास निर्माण सम्पन्न गरिसक्न समय सीमा २०७७ असार            तोकेको छ ।

प्राधिकरणका अनुसार तेस्रो किस्ताको अनुदान रकम लिइसक्ने समय पनि असार मसान्त तोकिएको छ ।

---

---

प्राधिकरणको पाँच वर्षे म्याद विसं २०७७ पुस १० गते सकिंदै छ । प्राधिकरणले भूकम्पबाट प्रभावित निजी आवासर घर निर्माणको काम सम्पन्न त्यसअघि नै पूरा गर्ने योजना थियो ।

प्राधिकरणले भूकम्प लाभग्राही कायम गर्ने तथा टुंगो लगाउने समय सीमा यही पुस मसान्त तोकेको छ भने पहिलो किस्ता माघसम्ममा, दोस्रो किस्ता वैशाखसम्ममा र तेस्रो किस्ता असार मसान्तसम्म लिइसक्नु पर्ने सीमा निर्धारण             गरेको छ ।

प्राधिकरणले मंगलवार जारी गरेको सूचना अनुसार एकीकृत वस्ती, जोखीम क्षेत्र, भूमिहीन, काठमाडौं उपत्यका भित्रका लाभग्राही र छूट तथा पुनः जाँच सर्वेक्षणको लगत विश्लेषण बाट कायम हुने लाभग्राहीको हकमा यस्तो व्यवस्था गरेको हो ।

सूचनाअनुसार पहिलो र दोस्रो किस्ताको अनुदान लिइसकेका ३ लाख ९३ हजार १७८ लाभग्राहीले २०७७ असार मसान्तसम्म तेस्रो किस्ता लिइसक्नुपर्ने छ । त्यसमध्ये पहिलो किस्ता लिएर तेस्रो किस्ता नलिएकाको संख्या २ लाख ४४ हजार ६९३ र दोस्रो किस्ता लिएर तेस्रो किस्ता नलिएकाको संख्या १ लाख ४८ हजार ४८५ रहेको छ ।

प्राधिकरणको तथ्यांक अनुसार हालसम्म १० लाख ३६ हजार ५६८ घरधुरी सर्वेक्षण गरिएकोमा ७ लाख ८० हजार ८०२ लाभग्राहीसँग अनुदान सम्झौता भइसकेको छ । त्यसमध्ये पहिलो किस्ताको अनुदान पाउनेको संख्या ७ लाख ६९ हजार ९२६ पुगेको छ भने दोस्रो र तेस्रो किस्ता पाउने लाभग्राहीको संख्या क्रमशः ६ लाख २१ हजार ४४१ र ५ लाख २५ हजार २३३ रहेको          छ ।

प्राधिकरणका अनुसार हालसम्म ४ लाख ८२ हजार ३२३ ले निजी आवास निर्माण गरिसकेका छन् भने ६ लाख ७१ हजार ५०६ ओटा निजी आवास निर्माणाधीन अवस्था मा छन् ।

सरकारले भूकम्पपीडितका निजी आवास निर्माण गर्न पहिलो किस्तामा रू. ५० हजार, दोस्रो किस्तामा रू. १ लाख ५० हजार र तेस्रो किस्तामा रू. ५० हजार गरी रू. ३ लाख अनुदान उपलब्ध गराउँदै आएको छ ।