बारपाकमा निर्माणाधिन ‘भूकम्प स्मृति पार्क’ को ६० प्रतिशत निर्माण कार्य सकिएको छ । २०७२ सालको भूकम्पमा ज्यान गुमाएहरुको सम्झनामा पार्क निर्माण गर्न लागिएको हो ।

भौगोलिक विकटता र मौसमका कारण पार्क निर्माणमा केहि ढिलाइ भएपनि संरचना निर्माण कार्य लगभग सकिएको जिल्ला आयोजना कार्यान्वयन इकाइ                  (भवन) की प्रमुख सुनिता श्रेष्ठले बताइन् । ‘सडकको स्तरोन्नती हुन नसक्दा सामान ढुवानीमा समस्या हुदै आएको छ,’ उनले भनिन्,                ‘समयमै सामान ढुवानी भए लक्ष्य अनुसार काम गर्न सकिन्छ ।’

---

---

बर्खामा सामान ढुवानीमा समस्या भएको उनको भनाइ छ । चालु आर्थिक वर्षभित्र निर्माण कार्य सक्ने लक्ष्य भएपनि निर्माण कार्य शुरु गर्न ढिलाइ हुदा समस्या भएको उनले बताइन् । स्थानको बिषयमा स्थानीय बिच विवाद हुदा समयमै काम शुरु हुन नसकेको हो ।

पार्क निर्माणका लागि २०७४ साल मंसिर महिनामा ठेक्का सम्झौता भएको हो । पार्क भित्र भूकम्पमा ज्यान गुमाउनेहरुको सम्झानामा स्मृति स्तम्भ, स्मारक, शौचालय, क्यान्टिन, पार्क, बगैचा लगायतका संरचनाहरु बन्नेछन् ।

‘पार्कको स्तम्भको निर्माण कार्य सकियो, फिनिसिङ गर्न मात्र वाँकी छ, त्यो काम सके लगतै भित्री मण्डला निर्माणको काम शुरु गर्छाै,’ उनले भनिन् ।

दुइ वटा शौचालय र एक क्यान्टिङ निर्माणको काम भर्खर सकिएको र प्लास्टर गर्न वाँकी           रहेको उनले बताइन् । त्यस्तै आवातजावतका लागि पार्कभित्रका सडकहरु निर्माण भईरहेको उनले बताइन् ।

‘पार्क भित्रै करिव ७ सय मिटर सडक निर्माण गर्ने गरि डिजाइन बनेको छ,’ उनले भनिन्, ‘ग्राभेलको काम सकेर कालोपत्रे गर्ने तयारी छ ।’ कल्वर्ड राख्ने, रिर्टनिङ वाल उठाउने काम लगभग ७५ प्रतिशत सकिएको उनले               जानकारी दिइन् । चालु आर्थिक बर्षको अन्त्य सम्ममा काम सक्ने गरी काम अघि बढेको श्रेष्ठको भनाइ छ ।

पार्क भित्र टिकट काउन्टर, पार्किङ स्थल बनाउन बाँकी रहेको उनले जानकारी    दिइन् । पार्क निर्माणका लागी            करिब १३ करोड रकम लाग्ने अनुमान गरिएको छ ।

‘अहिलेसम्म ४ करोड ७६ लाख, ८६ हजार रुपैया खर्च भइसक्यो, चालु आर्थिक बर्षका लागि २ करोड बजेट आएको छ, अपुग रकम केन्द्रिय आयोजना कार्यान्वयन इकाइ भवनमा माग गरी पठाएका छौ,’ उनले भनिन् ।

पार्क निर्माणले आन्तरिक तथा बाह्य पर्यटक आगमन बृद्धि हुने र जिल्लाको पर्यटन प्रवद्र्धनमा सहयोग पुग्ने स्थानीयको अपेक्षा छ ।