केशव गुरुङ

चालु आर्थिक वर्ष धार्चे गाउँपालिकाको सवै वडामा केन्द्रिय विद्युत प्रसारण लाइन पुग्ने भएको छ ।
तिव्र गतिमा काम भइरहेको नेपाल विद्युत प्राधिकरण आरुघाट वितरण केन्द्रका प्रमुख निरज पौडेलले बताए । ‘टेन्डर प्रक्रिया भइसक्यो,’ उनले भने, ‘अव छिटै सम्झौता भएर काम अघि  बढ्छ ।’

---

---

उत्तरी गोरखामा केन्द्रिय प्रसारण लाइन विस्तारका लागि गण्डकी प्रदेशको भौतिक पुर्वाधार विकास मन्त्रालयबाट ६ करोड विनियोजना भएको उनले बताए । केन्द्रले ३ करोड ५० लाख रकम दिएको उनको भनाइ छ । हाल धार्चे गाउँपालिकाको माछाखोला सम्म लाइन तान्ने काम भइरहेको पौडेलले जानकारी दिए ।

‘यहि बैशाख सम्म माछोखोलासम्म केन्द्रिय प्रसारण लाइन पु¥याउने लक्ष्य राखेका छौ, त्यस पश्चात माथिल्लो भेगमा विस्तार गर्दै लैजाने योजना छ,’ उनले भने । आरुघाट वितरण केन्द्रले धार्चे गाउँपालिकाको गुम्दा, लापु, उहिया,काशीगाउँ र केरौजामा सम्म केन्द्रिय विद्युत पु¥याउने बताइएको छ ।

दुई बर्ष भित्र चुमनुव्री गाउँपालिका सम्म केन्द्रिय विद्युत प्रसारण लाइन पु¥याउने लक्ष्य रहेको पौडेलले बताए ।

भौगोलिक बिकटताका कारण चुमनुव्री गाउँपालिका तत्काल केन्द्रिय लाइन जोडन असम्भव  रहेको उनको भनाइ छ ।

बारपाक देखि लाप्राक सम्म केन्द्रिय प्रसारण लाइन जोड्न प्रक्रिया शुरु भइसकेको छ । उक्त काम नेपाल बिद्युत प्राधिकरण गोरखा वितरण केन्द्रले गर्नेछ । सर्भेको काम  भइरहेको  कार्यालय प्रमुख माधव न्यौपानेले बताए ।

उक्त कामका लागी एक करोड ९० लाख रकम विनियोजना भएको उनले  जानकारी दिए । मनिला निर्माण सेवाले जिम्मा पाएको उक्त काम चालु आव भित्र सक्नुपर्ने  छ । हाल धार्चे गाउँपालिका–७ लापुको लिदिङसम्म केन्द्रिय प्रसारण लाइन पुगिसकेको छ ।

त्यस्तै अजिरकोटको खरिवोट, हंसपुर, मुच्चोक, घ्याच्चोक र बारपाक सुलिकोटको बारपाक र सौरपानीमा पनि चालु आवमा केन्द्रिय लाइन पुग्ने बताइएको छ।