झाडीमा अलपत्र छाडिएको मोटरसाईकल फिर्ता ल्याइयो
झाडीमा अलपत्र छाडिएको मोटरसाईकल फिर्ता ल्याइयो
महिनौ देखि गोरखा नगरपालिका–३ होलसिङमा वेवारिसे अवस्थामा छाडिएको खानेपानी मन्त्रालयको मोटरसाइकल फिर्ता ल्याइएको छ ।
बिहीवार संचार माध्यममा समाचार प्रकाशन भएसँगै मन्त्रालयले बाइक लिन पठाएको हो ।
‘हामीले बाइक र मान्छे दुवैलाइ नियन्त्रणमा लिन भनेर गोरखाको प्रशासन र प्रहरी कार्यालयमा चिठि पठाइसकेका छौ,’ मन्त्रालयका दिपेन्द्र केसीले भने, ‘बाइक प्रहरीले त्यो ठाउँबाट ल्याइसक्यो, मान्छेको खोजी भइरहेको प्रहरीले बताएको छ ।’ मान्छे र वाइक दुवैलाइ नियन्त्रणमा लिएर मन्त्रालयमा पठाउन भनिएको उनले बताए ।
फिर्ता ल्याइएको मोटरसाइकल हामीले खानेपानी तथा सरसफाइ डिभिजन कार्यालय गोरखालाइ बुझाइएको जिल्ला प्रहरी प्रमुख एसपी ओम प्रसाद अधिकारीले बताए । बाइक लाने मान्छेको खोजी भइरहेको उनको भनाइ छ ।
होलसिङका नवराज अर्यालले मन्त्रालयको बा १ व ८२७१ नम्वरको यामाहा कम्पनीको अल्वा मोटरसाइकल विगत केही महिना देखि झाँडीमा अलपत्र अवस्थामा छाडेका थिए । अर्याल खानेपानी मन्त्रालयमा गाडी चालकको रुपमा करारमा काम गर्थे ।
तर उनले ६ महिना अघि जागिर छाडेको मन्त्रालयले जनाएको छ । सम्बन्धित निकायमा बाइक बुझाइदिन स्थानियले गर्दै आएको आग्रहलाइ अर्यालले वेवास्ता गर्दै आएका थिए । बाइक अलपत्र छाडेका उनी वेपत्ता छन् ।
उक्त मोटरसाइकललाइ घामपानी बाट जोगाउन स्थानीयले जस्ता र कुटले छोपिदिएका थिए ।
