अवैध रुपमा संचालित गोरखकाली क्रसर परिसरभित्र टिपरको ठक्करबाट एक महिलाको मृत्यु भएपछि गोरखा नगरपालिका–१० छेवेटार शुक्रवार विहानै देखि तनावग्रस्त थियो ।
बिहान दुध बेच्न घरबाट हिडेकी गोरखा नगरपालिका–१० अमलापानीकी ५२ बर्षिया मनमाया तामाङलाई ग १ ख ८०२७ नम्वरको टिपरले ठक्कर दिएको प्रहरीले जनाएको छ ।

ठक्करबाट सामान्य घाइते भएकी तामाङलाइ ब्याक गरी किचेर मारेको भन्दै स्थानीय आक्रोशित भए । आक्रोशित स्थानीयले उक्त टिपरमा आगजनी गरे । क्रसरमा रहेका करिव २५ सवारीसाधनमा उनीहरुले क्षति पु¥याए ।

---

---

क्रसरको कार्यालय र मजदुरको आवासको रुपमा प्रयोग भएका भवनहरु पनि तोडफोड  भए । अवैध रुपमा संचालन भएको उक्त क्रसर बन्द गर्नुपर्ने र उचित क्षतिपूर्ति उपलब्ध गराउनुपर्ने स्थानीय र पीडित परिवारले माग           राखे ।

माग पूरा नभएसम्म शव नउठाउने पीडित पक्षले अडान लिएपछि विभिन्न चरणमा वार्ताको प्रयासहरु भए । प्रमुख जिल्ला अधिकारीको संयोजनमा छेवेटारमा भएको पहिलो वार्ता विना निष्कर्ष टुङ्गियो ।

पीडित पक्षले अवैध क्रसर बन्द गर्नुपर्ने र ५० लाख क्षतिपूर्ति रकम दिनुपर्ने माग राखे । प्रजिअले नियमानुसार क्षतिपूर्ति रकम उपलब्ध हुने भनेपछि वार्ता  भाडियो । दोस्रो चरणको वार्ता बाह्र किलो बजारमा भयो । उक्त वार्तामा पनि पीडित पक्षले आफ्नो अडान छाडेनन् ।

सहमति नभएपछि पुनः वडाध्यक्ष सहित पीडित र पीडक पक्षबिच छुट्टै वार्ता शुरु भयो । पीडक पक्षले दश लाख सम्म क्षतिपूर्ति दिनसक्ने बतायो । अन्तत १५ लाख दिने शर्तमा सहमती जुट्यो । सहमति जुट्दै गर्दा पीडित पक्षले क्रसर बन्द गर्ने नगर्ने कुरा पनि उठाए । तर प्रजिअले पछि अध्ययन गरौला भन्दै टारिदिए । शुक्रवार राती सहमति जुटेपछि शनिवार शवको अन्तिम संस्कार गरिएको छ । टिपर चालक रामु बिक प्रहरीको नियन्त्रणमा रहेको डिएसपी वासुदेव खतिवडाले  बताए ।

घटनास्थलमा सबैभन्दा पहिले पुगेका ठकुरी भन्छन् ः टर्च लाइट             बलिरहेको थियो

महिलालाई किचेर मारेसँगै टिपर चालक घटनास्थल भन्दा केही पर गाडी पार्किङ गरेर  भागे । घटना भएको केही समयमै अमलापानीका स्थानीय माधव  ठकुरी घटनास्थल पुगेका थिए । सम्भवत घटनास्थल पुग्ने पहिलो व्यक्ति उनै हुन् ।

त्यहाँ पुगेर देखेको दृश्यबारे उनले सुरुवात दैनिकलाई यसरी सुनाए ः
‘मेरो छेवेटार बजारमा होटल छ । होटल जान भनेर म बिहान करिव सभा ६ बजे घरबाट  निस्किए ।  रिमरिम अध्याँरो थियो । घटना भएको ठाउँमा आइपुग्ने बेला लाइट बलिरहेको देखे । लाइट बाल्दै कोही आए होला भन्ने सोचे ।

तर त्यही पुगेर हेर्दा मान्छे लडिरहेको देखेपछि झस्किए । अनुहार चिन्न सक्ने अवस्थामा थिएन । सलले मुख ढाकेको रहेछ । हिजो राती एक जना मानसिक सन्तुलन गुमाएकी एक महिला गाउँमा हिडिरहेकी थिइ भन्ने सुनेको थिए, पहिले त त्यही होला भन्ने लाग्यो । तर भुइँमा पोखिएको दुध र लडिरहेको दुधको वोत्तल देखेपछि पक्कै मनमाया हो भन्ने शंका लाग्यो ।

उहाँ सधै बिहान दुध बेच्न छेवेटार जानुहुन्थ्यो । उहालाई दुध बेचेर फर्कदै गर्दा मैले सधै तारा माध्यामिक बिद्यालय नजिकै भेट्थे । मनमाया नै हो भन्ने भएपछि मैले घटनास्थल नजिकै घर भएको मान्छेलाइ बोलाए । त्यस अघि क्रसर नजिकैको पानी ट्याङकीमा मुख धुन दुइ जना आएका थिए, मैले सहयोगका लागी बोलाएको आएनन् । पछि घर नजिकैको मैले बोलाएको मान्छे  आए ।

हामीले क्रसरको मेनेजर देखेपछि बोलाएर प्रहरीलाइ खवर गर्न भन्यौ । अनि एकछिन पछि प्रहरी आयो ।’