चैत्र १ गतेबाट जिल्लामा दादुरा रुबेला खोप अभियान शुरु गरिने भएको छ ।
जिल्लाका ११ स्थानीयमा         चरणवद्ध रुपमा अभियान संचालन गरिने वुधवार बसेको जिल्ला खोप समन्वय समितिको वैठकले निर्णय गरेको हो ।

पहिलो चरणमा पाँच स्थानीय तहमा एकैसाथ अभियान शुरु हुने खोप सुपरभाइजर अधिकृत राजुरमण न्यौपानेले बताए । उनका अनुसार दोस्रो चरणमा बाँकी ६ स्थानीय तहमा अभियान संचालन गरिने छ ।

---

---

‘पहिले सिरानचोक, अजिरकोट, बारपाक सुलिकोट, भीमसेन थापा र आरुघाट गाउँपालिकामा अभियान शुरु गर्छाै,’ उनले भने, ‘दोस्रो चरणमा गोरखा र पालुङटार नगरपालिका, गण्डकी, शहिद लखन, चुमनुब्री र धार्चे गाउँपालिकामा अभियान शुरु          हुन्छ ।’ चैत्र १५ गतेबाट दोस्रो चरणको अभियान संचालन हुने उनले बताए ।

जिल्लाका ३ सय ६४ खोप केन्द्रबाट २० हजार ६ सय २० जना बालबालिकालाई खोप लगाउने लक्ष्य कार्यालयको छ । ९ महिना देखि ५ वर्ष मुनिका बालबालिकाहरुलाई खोप लगाइने छ ।

अभियानमा एक सय ६० स्वास्थ्यकर्मी र ९ सय २३ जना स्वयमसेविका खटिने छन् । खोप नलगाउँदा बालबालिकामा कुपोषण, झाडापखाला, निमोनिया, आँखा कान सम्बन्धी समस्या देखा पर्न सक्ने भएकाले अभियानमा साथ दिन कार्यालयले आग्रह गरेको छ ।

सोहि अभियानबाट नियमित खोप कार्यक्रमलाई थप सुदृढ बनाउदै लैजाने न्यौपानेले बताए । नेपाल सरकारले सन् २०२३ सम्ममा           दादुरा रुवेला खोप निवारण गर्ने लक्ष्य लिएको छ ।

सोही लक्ष्य अनुसार गण्डकी प्रदेशका सबै जिल्लामा चैत्र महिनाभरी खोप अभियान संचालन गरिसक्ने कार्यालयले जनाएको छ ।