जेठ १०, गोरखा । मकै वालीमा देखिएको फौजी किराको प्रकोप रोकथाम तथा नियन्त्रणका लागी तालिम संचालन गरिएको छ । पालुङटार नगरपालिकाको अगुवाइ तथा कृषि ज्ञान केन्द्र गोरखाको समन्वयमा शनिवार अनलाइनको माध्यमबाट तालिम संचालन गरिएको हो । तालिममा पालुङटार नगरपालिका, सिरानचोक गाउँपालिका र बारपाक सुलिकोट गाउँपालिकाका जनप्रतिनिधी, कृषि प्राविधिक, अगुवा कृषक तथा कृषि ज्ञान केन्द्रका प्रमुख एवं कर्मचारीको सहभागीता रहेको थियो ।

तालिममा कृषि बिज्ञहरुले सहजिकरण गरेका हुन् । कृषि तथा पशुपंक्षी बिकास मन्त्रालयका प्रवत्ता हरि बहादुर केसीले फौजी किराको व्यवस्थापन तथा नियन्त्रण सम्बन्धी कार्यपत्र प्रस्तुत गरेका थिए । अन्तराष्ट्रिय मकै तथा गहुँ वाली बिकास केन्द्रका बिउ बिशेषज्ञ डा. हरि कुमार श्रेष्ठले फौजी किराको पहिचान गर्ने तरिका, वालीमा देखिने लक्षण, त्यसले पु¥याउने क्षति र व्यवस्थापनका बारेमा कार्यपत्र प्रस्तुत गरेको कृषि ज्ञान केन्द्रकी प्रमुख मनिता थापाले बताइन् । उनका अनुसार राष्ट्रिय मकै वाली अनुसन्धान कार्यक्रमका बरिष्ठ बैज्ञानिक डा. घनश्याम भण्डारीले मकै वालीमा लाग्ने फौजी किराको बारेमा भइरहेको अनुसन्धानको काम बारे कार्यपत्र प्रस्तुत गरेका थिए ।

प्लान्ट क्वारेन्टाइन तथा बिषादी व्यवस्थापन केन्द्रका बरिष्ठ वाली संरक्षण अधिकृत रामकृष्ण सुवेदी र महेशचन्द्र आचार्यले क्रमश फौजी किराको अनुगमन तथा स्काउटिङ र फौजी किराको रसायनिक बिषादीबाट व्यवस्थापन गर्ने तरिकाको बारेमा कार्यपत्र प्रस्तुत गरेका थिए । आइडीइ नेपाल नामक संस्थाका बिज्ञ ललित शाहले जैविक बिधिबाट फौजी किराको व्यवस्थापन सम्बन्धमा कार्यपत्र प्रस्तुत गरेका थिए । अनलाइनको माध्यमबाट संचालन गरिएको तालिममा प्लान्ट क्वारेन्टाइन तथा बिषादी व्यवस्थापन केन्द्रका प्रमुख शहदेव हुमागाईको पनि सहभागीता रहेको कार्यालय प्रमुख थापाले बताइन् ।