कोरोना निको भएका आठ जना ‘डिस्चार्ज’
कोरोना निको भएका आठ जना ‘डिस्चार्ज’
गोरखाका ८ जना कोरोना संक्रमित ‘डिस्चार्ज’ भएका छन् । जिल्ला अस्पताल गोरखाको आइसोलेसनमा उपचारारत उनीहरुलाई शनिवार डिस्चार्ज गरिएको हो ।
दुई पटकको पिसिआर रिपोर्ट नेगेटिभ आएपछि घर पठाइएको अस्पतालका सूचना अधिकारी कृष्ण ढकालले बताए ।
डिस्चार्ज हुनेमा गण्डकी गाउँपालिकाका चार, भिमसेन थापा गाउँपालिकाका दुई, पालुङटार नगरपालिकाका र काभ्रेका एक÷एक जना रहेका छन् । उनीहरु १७ देखि ४३ बर्ष उमेर समूहका पुरुष रहेको अस्पतालले जनाएको छ ।
१४ दिन होम क्वारेन्टिनमा बस्ने गरी उनीहरुलाइ डिस्चार्ज गरिएको ढकालले बताए । निको भएका संक्रमितलाई स्वास्थ्य सामग्री सहित फूलको गुच्छा दिएर घर पठाइएको हो । उनीहरु डिस्चार्ज भएसँगै अस्पतालको आइसोलेसनमा १६ जना संक्रमितहरु उपचाररत छन् ।
थप ५ जनामा संक्रमण
थप पाच जनामा कोरोना पुष्टि भएको छ । भिमसेन थापा गाउँपालिकाका–५ का तीन जना, वडा नम्बर ७ र ८ का एक÷एक जना गरी कुल ५ जनामा कोरोना संक्रमण पुष्टि भएको गाउँपालिकाका स्वास्थ्य शाखा प्रमुख भेषराज खनालले बताए ।
संक्रमण पुष्टि भएका मध्ये तीन जना भारतबाट आएका हुन् भने दुइ जना मध्ये एक जना गाडी सहचालक हुन् । अर्का एक व्यक्ति भने प्रहरी हिरासतबाट छुटेका व्यक्ति हुन् ।‘हिरासतबाट छुटेर आएपनि हामीले उनको पीसीआर परीक्षणका लागि स्वाब संकलन गरेका थियौं । किनकी हिरासतमा बस्ने क्रममा पालुङटार नगरपालिकाका एक युवकमा कोरोना संक्रमण देखिएको थियो,’ खनालले भने, ‘हिरासतबाट छुटेका उनी घरमै बस्दै आएका थिए । तर आज(शुत्रबार) उनको रिपोर्ट पोजेटिभ आएको छ ।’
खनालका अनुसार अर्का संक्रमित सहचालक भने भारतबाट आएका भिमसेन थापा गाउँपालिकाका व्यक्तिहरुलाई लिन भैरहवा गएका थिए । ‘उहाँहरुले ल्याएका तीन जना मध्ये एक जनामा कोरोना देखिएपछि उहाँको पनि पीसीआर परिक्षण गर्न पठाउँदा रिपोर्ट पोजेटिभ आएको हो,’ उनले भने ।
गत जेठ २९ गते उनको पीसीआर परीक्षणका लागी नमूना संकलन गरेर पठाइएको खनालले जानकारी दिए । शुक्रबार संक्रमण पुष्टि भएका उनी पनि घरमा बस्दै आएका थिए । भारतबाट आएका बाँकी तीन संक्रमित सामूहिक क्वारेन्टिनमा बस्दै आएको खनालले बताए ।
संक्रमितलाई गोरखा क्याम्पसको आइसालेसनमा ल्याउने तयारी भइरहेको उनले जानकारी दिए । यससँगै गोरखामा कोरोना संक्रमितको संख्या ४० पुगेको छ ।
