बराम तथा दलित समुदायलाई बाख्रा
बराम तथा दलित समुदायलाई बाख्रा
आरुघाट गाउँपालिका–३ र ४ का बराम तथा दलित समुदायका परिवारलाई बाख्रा वितरणको तयारी गरिएको छ ।
व्यवसायिक बाख्रा पालनमा अग्रसर गराउदै आयआर्जनमा सघाउ पु¥याउने उदेश्य रहेको जलस्रोत तथा सिंचाइ डिभिजन कार्यालय गोरखाले जनाएको छ ।गण्डकी प्रदेशका निर्वाचन क्षेत्र पूर्वाधार बिकास कार्यक्रम अन्तरगत सो क्षेत्रका बराम तथा दलित समुदायका ५० घरधुरीलाइ बाख्रा वितरण गरिने कार्यालय प्रमुख रमेशराज शर्माले बताए ।
‘बाख्रा वितरण गरिने घरधुरी गाउँपालिकाले छनोट गरेको हो,’ उनले भने, ‘एक घरपरिवारलाई ३ देखि ५ वटा लोकल जातको बाख्रा वितरण गर्छाै ।’ समूहिक रुपमा उन्नत जातको ब्याड बोका पनि वितरण गर्ने तयारी रहेको उनको भनाइ छ । उनका अनुसार अहिले लाभग्राहीहरुले खोर बनाइरहेका छन् । करिव ९० प्रतिशत खोर बनाउने काम सम्पन्न भएको उनी बताउछन् ।
केही दिनमा बाख्रा वितरण गरिने उनले जानकारी दिए । ‘धावाको बञ्जरा फर्मसँग बाख्रा किन्ने सम्झौता भइसकेको छ, उपभोक्ता समिति मार्फत बाख्रा किन्ने हो,’ उनले भने । २५ लाखको उक्त कार्यक्रममा स्थानीयको १० प्रतिशत श्रमदान रहनेछ ।
बराम, दलित तथा अन्य जातिको आर्थिक अवस्था उत्थानका लागी बाख्रा वितरण तथा खोर निर्माण कार्यक्रम संचालन गरिएको कार्यालयले जनाएको छ ।
