सतर्क रहौ
सतर्क रहौ
अविरल बर्षाका कारण जिल्लाको बिभिन्न ठाउँमा पहिरो गएको छ । भौतिक मात्र नभइ मानविय क्षति पनि भएका छन् । कतिपयको घरगोठ पुरिएको छ । पशुचौपायाहरु मरेका छन् । बिभिन्न सडकहरु अवरुद्ध छन् ।
नदीहरुमा पानीको वहाव बढेको छ । केही दिन अझै बर्षा हुने सम्भावना रहेकाले पहिरो र बाढीको थप जोखिम छ । यस्तो बेला सबै नागरिक सतर्क हुनु आवश्यक छ ।
प्राकृतिक विपदलाइ हामी रोक्न सक्दैनौ । तर यसबाट हुने क्षतिलाइ कम गर्न भने पक्कै सकिन्छ । त्यसको लागी पूर्व सावधानी आवश्यक हुन्छ । मानविय गतिविधिकै कारण पनि विपदको जोखिम बढेको छ ।
प्राविधिक अध्ययन बिना भित्ता तथा पहराहरुमा जथाभावी डोजरले तासेर सडक बिस्तार गर्दा पहिरोको जोखिम बढेकै छ । नदिजन्य पदार्थको जथाभावी दोहनले खेतियोग्य जमिन डुवानका साथै कटान समेत हुने गरेको छ ।
वनजंगल विनाशले पनि पहिरोको जोखिम बढाएकै छ । यस्ता मानविय गतिविधी कम गर्न सकने जोखिम पनि कम हुने थियो । त्यस्तै जोखिम मानिएका वस्तीहरुमा अझै स्थानीय बसिरहेकै छन् ।
जोखिम वस्तीलाई समयमै स्थानान्तरण गर्न नसक्नु पनि सरकारको कमजोरी हो । विपदको पूर्व तयारीमा प्रशासन चुकेकै देखिन्छ । विपदको वेला आवश्यक उद्धार र राहतका सामग्री पनि पर्याप्त छैनन् ।
स्थानीय तहहरुले पनि विपद व्यवस्थापनका कार्यक्रमलाइ प्राथमिकतामा राखेर योजना बनाउनुपर्छ । विपद व्यवस्थापन समितिले बैठक मात्र गरेर हुदैन बैठकमा भएका निर्णय कार्यान्वयनमा जोड दिन सके विपद जोखिम न्यूनिकरण गर्न सकिन्छ की ! नागरिकहरु पनि सजग र सतर्क रहनु उत्तिकै आवश्यक छ ।
