लुइटेल भञ्ज्याङ भच्चेक सडकखण्ड अन्तरगत अजिरकोट गाउँपालिका–३ सिलामेमा पहिरोले सडक भासिएको छ ।
केही दिन अघिको बर्षाका कारण पहिरोले आधाभन्दा बढी सडक भासिँएपछि चार पाङ्ग्रे सवारी आवतजावत ठप्प बनेको छ ।

ग्याविङ वाल लगाएर मर्मतको तयारी भइरहेको राष्ट्रिय पुननिर्माण प्राधिकरण अनुदान व्यवस्थापन तथा स्थानीय पूर्वाधार इकाइ कार्यालयले जनाएको छ । सिरानचोक गाउँपालिकाको नयाँगाउँ देखि अजिरकोट गाउँपालिकाको सिरानडाँडासम्मको १३.८६ किलोमिटर उक्त सडकखण्ड अहिले कालोपत्रे भइरहेको छ ।

---

---

भूकम्पीय आपतकालीन सहायता परियोजना अन्तरगत काम भइरहेको इकाइ प्रमुख रामशरण आचार्यले बताए । द्रव्यशाह सडकखण्ड अन्तरगत पर्ने उक्त सडक कालोपत्रे गर्ने जिम्मा लामा कन्स्ट्रक्सन प्रालिले पाएको हो । करिव ३३ करोड लागतमा सडक कालोपत्रे हुन लागेको इकाइ प्रमुख आचार्यले जानकारी दिए ।

उनका अनुसार २०७५ असार २२ गते सम्झौता भएको उक्त काम २०७६ माघ ४ गते सक्नुपर्ने थियो । काम सम्पन्न नभएपछि साँडे चार महिना म्याद थप गरियो । तर त्यस अवधिमा पनि काम सम्पन्न नभएपछि ६ महिनाका लागी पुनः म्याद थप भएको छ । थप भएको म्याद अनुसार कात्तिक मसान्त सम्म काम सक्नुपर्छ ।

हालसम्म करिव ८६ प्रतिशत काम सकिएको आचार्य बताउछन् । लुइटेल भञ्ज्याङ भच्चेक सडकखण्ड अन्तरगतको लुइटेल भञ्ज्याङ देखि नयाँ गाउँसम्मको करिव ३० किलोमिटर सडक यस अघि नै कालोपत्रे भइसकेको छ ।

भूकम्पीय आपतकालीन सहायता परियोजना अन्तरगत एशियाली विकास वैंकको करिव ७० करोड र स्वीस सरकारको प्राविधिक सहयोगमा उक्त सडक कालोपत्रे भएको इकाइ प्रमुख आचार्यले बताए ।