कोरोना रोकथाम तथा नियन्त्रणका लागी सरकारले गरेको लक डाउनका कारण लामो समयसम्म बन्द रहेको जिल्लाका बिद्यालयहरु खुल्न थालेका छन् ।

स्वास्थ्य सुरक्षा मापदण्ड सँगै भौतिक दुरी कायम गरी कक्षाहरु संचालन गरिएको बिद्यालयका प्रधानाध्यापकहरु बताउछन् । आइतवारबाट कक्षा संचालन गरेको गोरखा नगरपालिका–७ डण्डीडाँडामा रहेको नवज्योती माविले कक्षा संचालनका लागी बार छुट्याएको छ ।

---

---

आइतवार १, ४, ६ र १० कक्षाका बिद्यार्थीलाइ पढाइने प्रधानाध्यापक शिवराम कट्टेलले बताए । उनका अनुसार सोमवार कक्षा २, ७ र ९ का बिद्यार्थीहरुको पठनपाठन हुन्छ ।

मंगलवार बाल बिकास कक्षा सँगै ३, ५ र ८ का बिद्यार्थीलाइ पढाइने उनले बताए । ‘वुधवारबाट पुन त्यही सेड्यूल दोहोरिन्छ, एक हप्तामा एक दिन एउटा बिषयको पालो आओस् भन्ने हो,’ उनले भने । शनिवार वाहेक दैनिक बिहाद दश बजेदेखि १ बजेसम्म तीन घण्टा मात्र पढाइ संचालन गरिएको उनले जानकारी दिए ।

उनका अनुसार स्वास्थ्य सुरक्षा मापदण्ड अनुसार एउटा बेन्चमा एक जना बिद्यार्थी राखिएको छ । ‘एउटा कक्षामा २० जना भन्दा बढी बिद्यार्थी राखेका छैनौ, धेरै बिद्यार्थी भएको कक्षालाइ सेक्सन ब्रेक गराएका छौ,’ उनले भने । बिद्यार्थी र शिक्षकका लागी मास्क अनिवार्य गरिएको छ ।

बिद्यालय पस्दा अनिवार्य रुपमा सावुन पानीले हात धुनुपर्ने उनले बताए । विद्यालयको प्रवेशद्धारमा हात धुने व्यवस्था गरिएको उनको भनाइ छ । ‘शिक्षकलाइ पनि बिद्यार्थीको पुस्तक नछुनु भनेका छौ, एउटा बिद्यार्थीको पाठ्यपुस्तक अर्काेले प्रयोग गर्न नपाउने भनेर नियम बनाएका छौ,’ उनले भने ।

गोरखा नगरपालिका–६ छहरेमा रहेको बालमन्दिर माविले पनि सोमवारबाट कक्षा शुरु गरेको छ । ‘अधिकांश बिद्यार्थी दुर्गम भेगका भएकाले आएका छैनन, अहिले बिद्यार्थीको संख्या कम भएकाले पनि बिद्यालयमा बोलाएर पढाउनु भन्दा पनि गृहकार्य दिएर पठाउने गरेका छौ,’ बिद्यालयका प्रधानाध्यापक लुमनाथ लामिछानेले भने ।

बिद्यार्थी र शिक्षकलाइ मास्क अनिवार्य गरिएको र बिद्यालय हाताको ठाउँठाउँमा हात धुने ठाउँको व्यवस्था गरिएको उनले बताए ।

धार्चे गाउँपालिकाका धेरैजसो बिद्यालय संचालनमा छन् । यही असोज ५ गते बसेको गाउँ शिक्षा समिति, जनप्रतिनिधी, विद्यालय व्यवस्थापन समिति, प्रधानाध्यापक लगायत सरोकारवालाको बैठकले बिद्यालय संचालन गर्ने निर्णय गरेको गाउँपालिकाका शिक्षा शाखा प्रमुख टिकाराम आचार्यले बताए ।

सोही निर्णय अनुसार आइतवारबाट कक्षा संचालन गरिएको लाप्राकको मणिकाम देवी माविका प्रधानाध्यापक धन बहादुर गुरुङ बताउछन् । दुई सिफ्ट गरेर पढाइ संचालन गरिएको उनको भनाइ छ ।

‘बिहान दश बजेदेखी १२ः४० सम्म दुइ देखि ६ कक्षाका बिद्यार्थीलाइ पढाउछौ,’ उनले भने, ‘१ बजेदेखि ४ बजेसम्म ७ देखी ११ कक्षाका बिद्यार्थीलाइ पढाइ हुन्छ ।’

एक कोठामा बढीमा १४ जना बिद्यार्थी राखिएको र मास्क र सेनिटाइजर अनिवार्य गरिएको उनले बताए ।
जिल्लाको आरुघाट, भीमसेन थापा गाउँपालिका, पालुङटार नगरपालिका लगायतका अन्य केही स्थानीय तहमा पनि बिद्यालयहरु खुल्न थालेका छन् ।